新冠肺炎在美國確診人數與日俱增，身在美國洛杉磯嘅王梓軒，因公事在身，未能趕及返港，惟有事事謹慎，做足防禦措施。梓軒話：「之前因為我有個project要同美國嘅同事一齊做前期創作，最近突然疫情喺美國爆發，所以無論大家喺邊都好，我鼓勵大家安守家中，不過我因為要補給必需日用品同埋食物，所以要出去。出去嘅話，都要策劃好一次過買晒所有需要嘅嘢，亦唔好逗留太耐！除咗避免感染病毒外，亦都可以減輕醫護人員嘅負擔，世界各地嘅醫院都係超負荷……」
梓軒途徑的大街，昔日很熱鬧，依家則非常冷清。
戴上口罩及眼鏡嘅梓軒，步行廿分鐘到附近一間日本人開的超級市場，沿途街上都很冷清，大部份嘅人都有戴上口罩防疫，梓軒話：「呢間超市設有人流管制，任何時間都只得12個顧客入去，而每朝8點半至9點就只准長者入舖頭，我覺得依個措施幾好，減小大家患病嘅風險。幸好呢間超市貨源充足，而且有限制購買，好多超市都被搶購，無哂貨了！」
梓軒衷心希望大家唔好盲搶物資，梓軒話：「有幾種物資依家嚴重缺貨，尤其口罩同手套，我之前喺網上睇到新聞，話有醫護冇口罩改用圍巾，醫護人員真係好缺乏醫療用品，有啲醫生為咗慳住用口罩，佢不眠不休唔食嘢唔飲嘢去工作十個鐘。另外，坊間又流傳緊有啲藥物可以醫治到肺炎，但係未經證實，啲人就搶晒返去，反而仲危險，真正有需要嘅人又冇藥食……所以大家真係要冷靜，唔好亂晒章，如果大家有能力嘅話，多咗嘅口罩可以捐俾醫護人員用，自己減小出門，我哋要自律，齊心去抗疫。」
售貨員都戴上口罩及手套，以策安全。