Anson Kong為即將上映的《ONE PIECE FILM RED》聲演「紅髮」撒古斯。
日本國民級動漫作品《海賊王》（ONE PIECE）的第15部電影《ONE PIECE FILM RED》，安排本月25日在港上映，電影公司今次請來MIRROR副隊長Anson Kong（江𤒹生）與COLLAR成員Marf（邱彥筒）擔任配音工作，分別聲演兩父女「紅髮」撒古斯及「超越次元的歌聲」美音。
收到片方邀請心情興奮
目前，MIRROR成員因紅館騷發生嚴重事故暫時停工，AK在演唱會舉行前接受傳媒訪問，分享首次挑戰配音工作的難忘感受。對於可以為自己由細睇到大的深愛動漫配音，AK坦言感覺很夢幻，他憶述當初得知收到片方邀請合作時的心情興奮，「我記得收到呢個消息嘅時候，當時拍緊《七月返歸》，花姐嚟探班，畀電話我睇問我做不做？我答當然做啦！」AK立即叫花姐替他接下這項工作，就算多忙也希望可以嘗試為卡通配音，而且《海賊王》是他支持多年的其中一套動漫，所以AK非常開心有機會參與今次配音。
應該點準備？
《海賊王》連載25周年，準備進入最終章，AK好開心能夠參與其中：「最終章其中一條主線，同我聲演嘅角色紅髮有關，所以我今次能夠為紅髮配音也很開心。」問到可有趁配音前先作準備，他表示：「我之前都好想做好準備，但都唔知應該點樣準備，因為配音時只畀我一份稿，冇得睇片先，要到配音當日先有得睇，公司都叫我好好準備，但我就問公司應該點準備，呢次想我把聲較厚啲同埋低沉啲，我就上YouTube參考日本版紅髮原本聲優，儘量從佢嘅聲線中模仿出紅髮嘅Character。」
只花個半小時完成
配音當天，AK只花了一個半小時便順利完成，他表示沒有想像中困難，初時也擔心自己難以應付，自言說話時會有懶音，但今次有導師在旁指導，加上紅髮這角色沒有太多對白，主要利用霸氣去震懾其他人，故他的對白都很簡短，一句起兩句止，所以不算很困難，而今次AK的挑戰性是要改一改平時說話風格，變得比較沉穩、沉實，過程中亦得指導提醒，表現出比較沉實才會更貼近紅髮性格。
最擅長叫咿咿呀呀
AK自爆今次為紅髮配音，最擅長是叫「咿咿呀呀」，被讚這些反應做得幾好，亦較快完成，當記者稱讚他可能是有做聲優的天份時，AK就笑着解釋：「我覺得真係太鍾意呢套卡通，對呢部動漫了解很深，所以好快投入成件事，唔存在我對配音十分有天份嘅問題。」師妹Marf則聲演紅髮的女兒美音，雖然動畫中有不少對手戲，但礙於大家因工作撞期而要分開進行配音。提到MIRROR成員得知AK為動畫配音時，也相當好奇他聲演甚麼角色，兄弟更自薦問：「《海賊王》仲有好多角色喎，嗰邊搵齊人未？」AK再強調太喜愛此作，故他表示沒有當今次是一份工作，其實他平時到日本，也會抽時間去朝聖，曾到東京鐵塔睇《海賊王》主題博物館及專賣店等，他聽回完成後的粵語版本，亦有種莫名其妙感覺：「係我把聲喺紅髮身上，係個想像唔到會發生嘅事，又真係發生咗。」AK早前推出個人單曲《信之卷》的MV特別以動畫形式製成，他透露開始想嘗試炮製屬於香港的本土動畫，他認真地說：「自己想去重新創作一個動漫世界，係畀香港觀眾欣賞，可能代表到香港，亦可以畀唔同嘅人留意到動漫文化。」
