鄧健泓自爆背李施嬅情挑石詠莉 被轟渣男

陳敏之開設個人YouTube頻道，不時邀請圈中好友撐場，早前一集就請來鄧健泓做嘉賓，並重提感情史。鄧健泓入行後，感情生活多姿多彩，先後與蓋世寶、原子鏸、李施嬅、龔嘉欣等拍拖，直至2013年與老婆石詠莉拍拖，並於2017年拉埋天窗。

節目中，鄧健泓坦言2007年已對石詠莉心動，更大爆自己背着李施嬅情挑對方，他亦直認賤格：「我第一次見佢（石詠莉）係喺《勁歌金曲》，我做完《勁歌》後......呢啲咪賤格囉！我傳訊息flirt（調情）佢。因為我嗰陣有女朋友，我只係flirt佢。我知佢住西貢，嗰度有間麥當勞，我約佢食消夜，佢話『好呀』。但始終有個問題唔係好好，我有女朋友......結果講完就算，因為我驚！堅驚！所以當佢係朋友，07年後無再溝通。」

鄧健泓自認「衰仔」

鄧健泓表示直至12年回復單身，偶而聽到石詠莉翻唱的《我代你哭》，才鼓起勇氣再聯絡對方，最終修成正果。此片一出後，惹來大量負評，雖然鄧健泓已認「衰仔」，但不少網民稱鄧健泓為「渣男」，更有網民發現該片離奇下架，懷疑是鄧健泓要求，不過陳敏之回覆傳媒表示，只是技術上錯誤，很快會重新上架。