出道三十一年嘅梁漢文(Edmond)近年專攻內地市場，上年參加《披荊斬棘的哥哥》之後又拍埋《大灣仔的夜》，睇佢社交帳戶都有唔少內地工作生活照，似乎發展唔錯。
早前央視搵梁漢文參與以戲曲為題材嘅綜藝節目《拿手好戲》，節目今個星期日出街，Edmond當然要po下宣傳相。不過節目組嘅官方相中，將梁漢文個樣過份修圖，十足九十年代言情小說封面咁。睇返其他參與藝人嘅官宣照，好似王祖藍咁，都係執到怪怪地。
央視形容《拿手好戲》係「戲曲沉浸式研學創演真人秀」，參加藝人以「跨界傳統愛好者」身份，學習唱做唸打等戲曲基本功。參與《拿》嘅嘉賓陣容包括演藝學院出身嘅王祖藍，內地藝人就有俞灝明、黃聖依等。早前有傳連成龍、劉德華同黃曉明都請得郁，但官方名單暫未見三人蹤影。
原文刊登於 Yahoo 娛樂LOL，am730獲授權轉載
