鄧麗欣為25年好姊妹送機喊到眼腫

近年不少港人移居海外，鄧麗欣（Stephy）今日（31/12）在社交網貼出日前到機場送別昔日中學時的好友，更喊到眼腫。

Stephy引用Cookies《最後一塊》的歌詞「誰離開～誰連戲～誰人必須執行李～」，並表示與這位好友自中一時相識，她寫道：「認識你的時候中一，那時候我住12樓，你住6樓，記得每天我都會搭lift落嚟6樓等你一齊行返學，有時你會呃我，你話你出得門口，但係我落到嚟仲見到你刷緊牙，唔緊要啦，我唔嬲。過幾年後你搬去一個同我相隔幾個輕鐵站嘅地方，當時我已經好唔捨得，沒想到25年後嘅今日，你要搬去一個離我有九千幾公里遠嘅地方，呢個心情，真係好難用言語去形容。」最後，Stephy表示即使好友離別，也不會影響她們之間的愛，更自爆自己哭腫了眼。