何雁詩日前接受《am730》專訪宣傳最新派台作品《欲哭無淚》。（蘇文傑攝）
何雁詩(Stephanie) 近年加盟新公司Moving Pictures主力專注在音樂發展，Stephanie日前接受《am730》專訪宣傳最新派台作品《欲哭無淚》，她說：「首歌主要係講經歷分手，記得嗰陣失戀爆喊試過耳仔積水發炎嚴重到要睇醫生。」談及初次與周國賢合作，她表示：「好坦白咁傾我哋對感情嘅睇法，我哋會有好多關於感情嘅嘢探討。」她繼續指與周國賢認識超過10年，而當初是透過共同朋友互相介紹認識。
何雁詩自認愛得轟烈。（蘇文傑攝）
大方承認與前度聯絡
談及愛情經歷，Stephanie直言：「其實我直到現階段都係算係轟烈嘅人，如果喺外界嚟講我會收得埋啲，以前拍拖都真係好轟烈，完全冇計算任何嘢。如果冇感覺嘅話，人哋個身份係點樣都唔重要。唔需要理佢有幾多身家，同埋做乜嘢工作？」講到過往的分手經驗，她直言：「我以前都鍾意揸架車出去，我覺得同人分開或者感情好寂寞嘅時候，喺一個好多人嘅地方反而唔知點樣去應對。」至於會否與前度聯絡，她表示：「好少，但我諗返仲有一個前度我依然有聯絡，我諗返嗰陣時分手唔係因為價值觀唔啱，只不過係感情淡咗而分開，到現階段我都覺得佢係一個好好心地嘅人。」談及會否出席前度的婚禮，她說：「都會去，可能因為我係天蠍座嘅人，我唔會因為見返佢諗返我哋以前嘅美好。」她指老公鄭俊弘則沒有與任何一位前度聯絡，並表示：「我唔會話抗拒唔俾，如果做到朋友唔好話刻意唔聯絡。」
何雁詩願意出席前度的婚禮。（蘇文傑攝）
疫情自資出歌曾蝕錢
被問到現階段音樂發展，Stephanie說：「我離開咗TVB嘅時候，有一段時間係自資出歌，我經歷過喺大公司當時有團隊照顧。」提到自資出歌的階段，她說：「嗰陣時係疫情自資出歌，其實拍MV同埋製作都一定超過六位數字，但我冇計到確實蝕咗幾多，我自己都唔想知。」被問到有指TVB多數會將資源放在劇集上，而製作音樂方面則沒有那麼重視，她說：「其實都唔可以咁計，無論係演員同埋租場地，全部都係好大嘅數目，對於我嚟講我唔覺得係多咗錢先做音樂，本身係一個計劃嘅數目。」她坦言從來不介意唱劇集歌曲，並表示：「當時完咗《超級巨星》，其實我有好長嘅一段時間都冇唱歌，主要係做主持。但如果話唔淨止出劇集歌當然更加好，有歌唱好過冇歌唱，因為好多人都冇得唱。」
大談TVB拍劇經歷
被問到當初簽約TVB有否想過會有機會拍劇，Stephanie說：「我一直都唔覺得自己係一個演員，我第一套拍嘅古裝劇係同王祖藍嘅《食為奴》，嗰陣我唔識游水，有個劇情要一腳伸我落去。所以我覺得TVB係一個好快鍛鍊到演員嘅地方。如果問我係咪最鍾意演戲，我就一定唔係，但我覺得係好好嘅經驗。」她憶述當年拍古裝劇曾經歷過男扮女裝和扮公主。講到拍古裝最辛酸的地方，她說：「當時我拍《天命》有一個角色係十公主，因為個造型打扮令到我條頸痛咗好耐，因為可能拍戲嘅時候要等待，條頸都一定會好痛，另外一樣嘢就係要返橫店拍劇，其實我唔鍾意離開香港。」
何雁詩第一套参與的TVB古裝劇《食為奴》。
難忘參演《四個女仔三個BAR》
談及最難忘的拍劇經驗，Stephanie分享：「拍《四個女仔三個BAR》嗰陣時就要學做律師，嗰陣時我同陳凱琳、陳瀅和劉佩玥都係第一次合作，我同陳瀅係最多拍劇時間喺埋一齊，之後我哋就變咗好朋友，曾經都試過一齊住。」她繼續分享當時拍《四個女仔三個BAR》最長時間連踩30小時。被問到與陳瀅同居的生活，她說：「我哋拍完《四個女仔三個BAR》之後就一齊租咗個地方住，嗰陣劉佩玥都會成日上嚟玩。」她指陳瀅的角色比較像大姐姐，並表示：「佢係一個好理性嘅人，如果我有唔開心，我都會喊住打俾佢，我可以信任佢嘅意見，通常我一打俾佢，一定係好大鑊嘅嘢。」
何雁詩與陳凱琳、陳瀅和劉佩玥合作拍過《四個女仔三個BAR》。
憶述當年孖陳瀅同居生活
提到患有天使綜合症的兒子，Stephanie說：「我覺得佢呢幾個月都叻咗，對於身邊嘅事物知道咗終於發生咩事多咗，對於有啲聲音都會產生後期變得好八卦，多咗同其他人對望，呢樣嘢都係幾大嘅改善，而家八月都準備開學入特殊學校。我聽好多家長講入咗特殊學校就會進步快咗，因為每日都會有密集式嘅訓練。」她指兒子正在接受音樂治療，並繼續指：「最近都開始同聾啞人士嘅老師學手語，其實都係言語治療去玩唔同嘅遊戲。」講到老公鄭俊弘曾經因兒子患病一事而感到難過，她表示：「佢而家嘅心情都OK嘅，佢唔會想係一個唔開心嘅情緒下面去湊大阿仔，只要見到少少進步都會好開心，嚟緊嘅生活都有心理準備同啲正常家庭唔同，冇再沉淪喺以前嘅情緒。」提到會否考慮繼續生孩子，她說：「暫時仲未有呢種諗法，一開頭係有啲衝動想去快啲生多個，又或者生兩個，但現階段又冇呢個想法。」
