八両金激動回應老婆指控食軟飯出軌家暴多宗罪 八両菜爆「佢患癌」
以騎呢聞名嘅喜劇演員八両金，90年代同年輕20年嘅老婆八両菜（何顓彤）建立家庭，二人婚後育有一子。但好景不常，八両金遇上金融風暴而損失慘重，當時八両菜更捨佢而去，多年來八両金帶住囝囝八両仔（葉小霆）做帶子洪郎。勢估唔到去到2023年，八両金同八両菜戲劇性復合，而更戲劇性嘅係八両菜呢排向傳媒大爆多年來八両金嘅秘密！
八両菜：八両金有報應
八両菜受訪時指，90年代二人仍未分開時，被八両金「踢去做地產」，更指八両金會check佢戶口睇下出糧未，又聲稱八両金冇俾家用但反而要老婆俾錢佢使。八両菜又話因為搵少咗而被八両金家暴，令佢情緒低落到諗過帶埋個仔做傻事。到後來八両菜話因為發現八両金出軌證據，於是決心離開。
離家廿幾年後，前年八両菜身體出問題，體重暴漲之餘腿部又因為被昆蟲咬傷而受感染，八両菜向八両金求助，對方要求復合，更透露原因係有人身患癌症於是求照顧。八両菜話自己照顧過癌症病人，睇到八両金嘅身上有水腫，推測病情不輕。八両菜今次終於心死，認為八両金有報應，又話係解脫。
八両菜鬧爆八両金之餘，仲大爆30歲嘅八両仔「懶到出汁」（影片截圖）
八両菜：八両仔懶到出汁連陪爸爸睇醫生都唔制
八両菜鬧爆八両金之餘，仲大爆30歲嘅八両仔「懶到出汁」，連陪爸爸睇醫生都唔制，寧願瞓覺。八両菜提議過八両金拎幾十萬出嚟搞小食店等個仔有收入，但就俾八両金拒絕。
八両金回應時相當激動，否認身患惡疾，話自己依然好好精神，「你聽吓我把聲，老虎都打死幾隻！你睇吓我3個月後，仲係咪尚在人間，到時你嚟廣州搵我，我請你食飯」。八両金又指當年八両菜拎佢十幾廿萬投資損手，最終都係由佢填氹。
原文刊登於 Yahoo 娛樂圈
ADVERTISEMENT
20周年「全城撐本地消費3重大激賞」！ 即睇活動詳情！
