傅嘉莉和張振朗出席《刑偵12》晚宴。（娛樂組攝)
傅嘉莉和張振朗出席《刑偵12》結局晚宴。講到大結局的情節，傅嘉莉和張振朗最後以親嘴鏡頭完美落幕，傅嘉莉接受訪問表示：「舒服嘅，因為個鏡頭都拍得好靚，其實拍嗰陣都係360度環繞咗好多個圈。」張振朗則笑言：「其實你問我都好怕羞嘅。」他繼續指今次在劇中演出的角色定位是「處男」，並笑稱：「最後佢嘅人生都誇咗一大步，經歷咗人格整合同埋生死，除咗錫錫之外真係諗唔到啲其他嘢，佢代表到呢個人嘅成長，或者角色之間嘅關係。」
提到播出大結局的情節，傅嘉莉被林保怡捉實頸部位置，她說：「其實拍完真係呆咗幾秒，嗰一種火花講返起都有麻痹嘅感覺，因為係一take過拍攝。」她繼續指第一次以素顏上陣演出電視劇，並表示：「我任何護膚品都冇，張振朗就不斷望住我，就覺得我係邊位呀！」張振朗則大讚傅嘉莉表現相當專業。被問到《刑偵12》是否會開續集，張振朗表示：「我哋都想啦！咁好玩，未必一定係續集嘅，可能係一樣嘅班底做新嘅嘢。」
講到張振朗較早前接受訪問透露昔日曾月入6千，他說：「以前係㗎！啱啱入職，人工一定係低，但我都好欣賞當時嘅自己，其實係好開心，唔係講緊因為錢嘅問題，係因為啱啱訓練班畢業，有好多唔同嘅機會。」傅嘉莉則表示：「原來嗰陣時你都有拍《愛我請留言》。」張振朗則幽默表示：「其實我都做咗好耐路人甲，嗰套劇都好啲嘅有少少角色。我行到去而家終於可以做到主角，對我嚟講都係好開心。」提到是否有計劃與女友楊偲泳(Renci)結婚，他直言：「暫時都冇呢個打算，再博吓事業先。」
張振朗被問到開演唱會計劃，他則興奮表示：「嚟緊我就嚟同姚子羚開演唱會，我哋會努力去鍛鍊自己。」至於演唱會的內容，他透露：「係會有少少愛情嘅音樂劇，大家睇開嘅演唱會都比較少呢樣嘢，始終我哋都唔係一個真正嘅歌手，現階段我就可以唱埋同埋演出俾你哋睇。」傅嘉莉則笑言：「俾個機會我同吳業坤上台錫錫。」張振朗答應傅嘉莉的要求，並直言：「可以我比15分鐘你哋上台盡情錫錫，想做啲乜嘢盡情去做，有呢個新嘅環節，就係吳業坤同埋傅嘉莉錫錫15分鐘。」
