2025-07-08 15:00:00

前TVB御用印度人陳振華抗癌一年分享治療過程　神經痛如千隻蟻咬

42歲嘅印度裔演員陳振華（Ricky）講得一口流利講東話，因而獲得唔少演出機會，曾於TVB 劇集《金宵大廈》飾演鄧佩儀男友「蛙蛙」而令人熟悉。不過，陳振華2020年被老婆Alison於社交平台公開其渣男行為，踢爆佢曾經偷食、虐打女兒及欠債累累等等，形象插水。去年8月，陳振華自爆「中咗獎」患上鼻咽癌第四期，兩個月後決定暫停拍攝短片，休息抗癌；事隔接近一年，陳振華近日拍片分享抗癌近1年的心路歷程。

面部神經痛到不得了：食幾多止痛藥都冇用

影片中陳振華依然比以前瘦，但精神睇落唔錯。Ricky提到接受治療前，面部嘅神經痛「痛到不得了」，猶如「幾千隻蟻喺我塊面度躝」，又形容痛楚好似係喺眼球後面有嘢抓住，食幾多止痛藥都冇用。陳振華前後做咗12次化療及33次放射治療。陳振華指每次化療大概需要5至6小時，過程係將4包鹽水同2至3包化療藥由血管注入，喺第3次化療後，陳振華嘅面部神經痛楚突然完全消失，副作用亦唔明顯。血管開始疼痛同腫脹，姑娘因此需要換手吊鹽水。

化療其他作用如食慾不振等，令陳振華聞到食物氣味都想嘔。Ricky記得完成第5次化療後去食牛腩麵，點知食到一半就食唔落。陳振華之後戴住口罩行返屋企，點知被自己嘅口氣搞到想嘔。Ricky強調唔係因為口臭，而係被自己食完牛腩麵口中殘餘味道搞到作嘔。除咗呢個癥狀，陳振華覺得自己有手腳麻痺、行路唔夠力同不時頭暈。

多次拍片記錄抗癌經過鼓勵同路人

患癌嘅陳振華去年8月拍片時樂觀地表示自己心態保持得好平穩，希望趕走癌細胞，又想藉自己嘅經歷鼓勵同路人，指鼻咽癌一啲都唔可怕，最緊要係積極治療及面對。期間，陳振華多次拍片記錄抗癌經過，直至10月決定暫停短片，表示想打贏場仗先再拍片畀大家睇，但就指現時身體越嚟越好。陳振華喺今年過年期間再次拍片送上祝福，當時Ricky仲係「剷青」頭，祝賀網民「個個都要身體健康，心想事成咁就乜都得，恭喜！恭喜！」從影片中睇到，陳振華身形比前暴瘦，但睇得出精神狀態唔錯，佢回應網民留言指相信自己一定會好返：「原本86（斤）而家74（斤）（約26磅），我啱啱化療結束，三個月後先知道，因為到時先可以複檢，我一定會好返。」

原文刊登於 Yahoo 娛樂圈