反黑2｜宋本中導演被幕後爆有拖糧前科 申訴得直都冇錢收
香港黑幫網絡劇集《反黑》由宋本中執導，於2016年播出大受歡迎，2018年宣布開拍續集《反黑2》，演員包括陳小春、張耀揚、謝天華、王合喜、陳國坤 等等。不過自開拍以來，《反黑2》曾數度對外透露因資金開題而停拍，更一度拖欠17名劇組人員薪金，包括製片組，副導演組，美術組，服裝組，攝影組，燈工組，後期組，共超過90萬。
早前，宋本中於社交平台分享《反黑2》「拯救大行動」短片，重申指當日因被澳門Astro公司走數，現時希望眾籌400萬元填補資金短缺，表示已走投無路：「此項目的辛酸不足為外人道，如不是到了走投無路的狀態，我亦不想走眾籌捐贈資助之路，可惜情況已經壞到了輪不到我選擇。」眾籌最後得到47名支持者，共籌得$32,281港元。然而，籌款影片卻隨即下架，網站顯示發起人已於5月29日取消此專案嘅籌款。
幕後工作人員：審裁官聽到宋本中對答都黑晒面
日前（5月31日），一名自稱《反黑2》幕後工作人員嘅網民於《港產片士多》專頁上發布千字文聲討宋本中，指當日拍攝另一套未有上畫電影《老友情歲月》宋本中同樣以投資者反口無繼續畀錢為由欠薪，本身與另外16位工作人員諗住透過協商解決問題，但只可提出申斥，於是喺電影工作者總會協助下，向勞工處求助；表示當時有同宋本中講，對方亦冇反對，仲表示會同投資者講已搞到上勞工處。
該幕後工作人員透露於2020年3月展開長達兩年嘅訴訟，宋本中嘅無賴行為令佢哋大開眼界，表示：「首先根據審裁處要穿俾宋本中掛號文件（包括個人合約、申訴文件等），全部無人簽收，一一被打回頭。明明都係寄同一個公司地址，而且係審裁處認定公司注冊地址。我哋被打回頭、法庭信佢有收。」
又指，宋本中就申訴提出回覆口供，但收到後完全冇人睇得明，到第二次開庭嗰陣，宋本中又以covid自我隔離為由僅派助手做代表人出庭，仲反斥責一班幕後工作人員：「佢話我哋：『1. 寄錯地址 / 2. 話我哋簽月薪同事係開拍先計時薪 / 3. 話我哋打電話阻攔投資人繼續投資』」
就連審裁官當時聽到宋本中嘅對答都黑晒面，最後罰宋本中一個月內交大約總欠薪額一半嘅保證金，如果唔交嘅造就會判一班工作人員勝訴。
一個月後，宋本中除咗冇交到保證金，開庭亦冇出現，最後審裁處判一班工作人員勝訴。不過，宋本中依然玩嘢，向審裁處上訴，僅又因Covid無出庭延後上庭日期，令一班工作人員喺破欠基金嘅申請因而暫停：「因為宋本中公司係有限公司，喺有限公司報稱無資產嘅情況下，欠薪由破欠基金有限額地支付，當時最高額為$36,000（其實有一半同事被拖欠嘅人工同呢個數相距甚遠，不過件事行到呢度都只可以係咁）。所以，宋及佢公司係一毫子都唔洗俾。」
現時，破欠基金已準備補償欠薪嘅支票，並建議申訴人向審裁處及審裁官發信表述每次庭上嘅判決內容；最後於發信後半個月內，審裁官決定維持原判，亦唔需要再出庭。
該幕後工作人員透露，勞工處職員當時收到申訴第一個反應係表示已經差唔多十幾年冇收到演藝圈呢行有集體欠薪申訴：「無論電影電視行業興盛或者如今市道低迷，夢工場都承載住好多好多人嘅理想同用心。我哋係努力實踐理想嘅人，我哋係用專業推動行業進步嘅人。我哋唔希望立心不良嘅人，利用行業破壞業界名聲。無論做邊一個崗位，首先要做一個人！」
原文刊登於 Yahoo 娛樂圈
立即更新/下載AM730手機APP 體驗升級功能
