2019-01-03 06:00:00

古天樂奪最喜愛男歌手成歌影視「大滿貫」藝人

古天樂上年與謝安琪合唱《（一個男人）一個女人和浴室》，憑半首歌奪叱咤「我最喜愛的男歌手」。古仔從後台步出時，全場起鬨，眾人更站立拍手，他上台即謂︰「你哋唔使企晒起身，搞到我攞終身成就獎咁！」

古仔在台上語重心長說道︰「我上年做咗演藝人協會會長，我第一個職責，我好想幫啲歌手，我用自己僅餘時間，同好多歌手食過飯，了解今日樂壇的變化。我了解完後，只知道佢哋嗰團火從來無熄過。真係記住，心裡面嘅夢想同心中團火，每一秒都唔好忘記，無論成功與否，做人都唔好怕蝕底。我哋香港樂壇就係靠你哋。」

其實古仔分別於99年及01年，憑《刑事偵緝檔案IV》及《尋秦記》獲得視帝獎項；上年憑《殺破狼．貪狼》奪得金像獎最佳男主角獎，成為影帝；今年在樂壇再贏得「我最喜愛的男歌手」，成為香港首位歌影視「大滿貫」藝人。