2025-07-02 17:30:00

呂慧儀低調半工讀下完成牛津課程　大學「神科」畢業曾做教師

呂慧儀近年憑處境劇《愛．回家之開心速遞》「熊若水」一角成功入屋，被指將劇內角色嘅港女性格演繹得好好，但現實中嘅呂慧儀一啲都唔港女，仲好學不倦，日前透露自己半工讀下完成牛津大學賽德商學院課程。

呂慧儀以「半工讀的媽媽」為題於小紅書分享生活

呂慧儀日前於小紅書以「半工讀的媽媽」為題分享記錄生活嘅影片，透露早前喺香港教育大學教育博士王駿雄鼓勵下報讀牛津大學賽德商學院（Saïd Business School, University of Oxford）Executive Leadership課程，指自己喺一開始時唔敢同人講，悄悄地努力，怕太耐冇執筆會讀唔到，但慢慢地重拾閱讀嘅節奏，現在亦已完成課程。從影片看到，呂慧儀分享過往把握時間溫書嘅畫面，表示自己唔放過任何一個可以做功課嘅時間：「在家空閒時、在等埋位時、在廣州來回的車上、等吃飯、看老闆練水、等接放學、做美甲⋯⋯幾乎每一個可以打開功課的時間，我都在做筆記。我喜歡一邊寫、一邊理解、一邊記下來的過程。」

呂慧儀表示，同學仔都係來自世界各地，有著唔同嘅職業，包括大企業嘅領導、醫療機構主管、小公司嘅主管等等，只有佢一個來自香港，透過讀書及與同學們討論嘅過程，令佢唔再局限喺自己嘅框框裡，而係見到更廣闊嘅想法。續指，今次讀書令佢得到滿足感，也發現自己仲有好多進步空間，更開心兒子多咗一個讀書伴侶：「我很慶幸當初那個悄悄努力的自己，沒有放棄。知識讓我連結世界，也讓我重新認識自己。而最開心的是，蟹籽好像多了一個讀書 buddy。我們一起閱讀、一起努力，感覺媽媽不只是陪你長大，而是陪你一起努力。」網民紛紛大讚呂慧儀厲害，係兒子嘅好榜樣：「很厲害的蟹蟹，毅力爆棚！相信已成為蟹籽的好榜樣！」、「恭喜恭喜，半工讀的媽咪是很難的」、「若水好勁阿！好鼓舞！」、「好學嘅女人令人欣賞一亦係一位好媽媽」、「你付出的毅力，散發着魅力，令人佩服」等等。