大富豪重開｜歡場片取景熱點 吳君如《金雞》耍醉拳 美國隊長都嚟過？
曾經於八九十年代成為尖東夜生活地標嘅大富豪夜總會，2012年停業後終於得到財團垂青，報稱耗資1億元及歷時18個月裝修，打造成為娛樂場所大富豪 BIG BOSS GENERATION，將於本月中旬開業，更邀請到前日本AV女優蒼井空出席剪綵。新大富豪不設女公關，轉型為「多功能娛樂場所」，歡迎男女老少入場。
香港紙醉金迷年代的象徵
大富豪夜總會是香港經濟起飛時期的標記，象徵紙醉金迷的年代，唔少港產片都曾經喺大富豪拍攝。最經典嘅應該係吳君如主演嘅《金雞》。戲中吳君如飾演嘅阿金係夜總會小姐，但係以風格騎呢見稱，仲會喺夜總會耍醉拳，令唔少八九十後觀眾對大富豪留下印象。除此之外，八九十年代唔少港產片都以歡場女子生活為題材，由《星星月亮太陽》、《午夜麗人》、《火舞風雲》到90年代後期嘅《紅燈區》，都喺多間大型夜總會取景拍攝。
港產片以外，2009年上映嘅荷里活電影《超能風暴》(Push)都有喺大富豪夜總會拍攝嘅場口。故事以香港為背景，講述美國政府嘅超能人實驗計劃，一個關乎呢個計劃秘密嘅箱輾轉間流落到香港，令各方人馬喺城市中奔走爭奪。《超能風暴》男主角係美國隊長Chris Evans，並且搵到唔少香港藝人如阿Bob林盛斌、劉玉翠、車保羅等參演。
原文刊登於 Yahoo 娛樂圈
立即更新/下載AM730手機APP 體驗升級功能
