GM不甘被指「懶懶閒」，激動哽咽兼聲震震直認好緊張Sophie。
無綫公布上周（11日至17日）收視，根據CSM媒介研究及YOUBORA收視資料數據顯示，資訊節目《東張西望》跨平台直播收視最高22.3點（144萬觀眾），踞收視榜首位，而真人騷戀綜《女神配對計劃》最高收視15.1點，多達98萬觀眾。《女神配對計劃》於前日（17日）晚播出第11集，是Dating Camp最終回，今Round將由五位女神親自決定留低/淘汰勇者，經過一輪調配，T.Max選擇調組，由羅毓儀組調去梁敏巧組，而醫美太子爺Kenneth，則由羅毓儀組調去李芷晴組。
葉蒨文（Sophie）向來被視為競爭激烈一組，雖然曾展望（GM）看似由頭帶到尾，但林澤譯（Him）及林堡熙（Eddie）完全沒有退縮，到了被淘汰前一刻，三人爭取最後機會真情剖白，本集GM難得一見地不再玩玩吓、改為認真tone向女神真情剖白；雖然觸發點只是「幫Sophie搵電話」，但自覺被誤解的GM仍數度委屈至哽咽兼落淚。在單對單真情對話環節，GM主動找上Sophie為自己辯解，包括1.不主動是因不想被感到霸住Sophie，2.為了Sophie已展現了應有的男士風度，3. 幫Sophie找電話時絕對很努力，4.十分緊張Sophie及重視Sophie對自己的看法。GM：「我唔想令你覺得我懶懶閒，唔在乎，我唔係咯」、「其實其他人誤解我唔係好著緊，我淨係緊張你有冇誤解我」、「係咪每次我一笑，跟住就（代表）咩都冇做咁哩…」當GM提到被誤解找電話不夠落力時，深感委屈的他一再哽咽、數度難過至說不出話，去到最後更流下男兒淚。
GM出乎意料的脆弱令Sophie方寸大亂，一再出招安慰及氹GM之餘，自己亦忍不住被感染落淚，充份展現了她對GM的共情。雖然委屈又難過，但GM最後不忘向Sophie大派定心丸：「我淨係想同你講我好緊張你。」當得到Sophie肯定時，眼眶仍帶著淚光的GM馬上破涕為笑，並纏著Sophie冧豬地說自己想主動message聯絡她，鬼咁冤氣。
Sophie事後接受製作組訪問，坦言全盤接收了GM的真心、真摯及真誠：「其實呢個都係我鍾意GM嘅其中一個原因，就係佢一啲都唔會假同造作，佢唔識咯，所以我覺得佢嗰吓係真情流露，佢真係好努力，佢都真係幾鍾意我。」被GM嚴重觸動的Sophie，事後與Eddie真情對話時，最初仍藏不住眼淚，Eddie見狀即體貼地主動送上慰問：「有咩忐忑呀？或者你諗咩，講吓你自己？」Sophie聽畢即感嘆參與《女神》這個真人騷拍攝，令她看到了很多意想不到的真實人性：「好多人都問我，係咪有劇本，我從來答人都係『起碼我好真』…啱啱我覺得係原來好多人都好真，我覺得好特別呢個體驗，我覺得會好多年之後都會好難忘。」Eddie聽完即把握機會展示真心，並承諾適當時機會主動邀請Sophie再進一步：「我覺得我係冇睇錯，我哋享受嘅幸福係同一樣嘢，譬如我做一件 事，我覺得好開心，我望過嚟，原來你都好開心架喎…」、「暫時我想確保大家個Feel啱，我搵到我搵嘅人啫，唔代表你搵到吖嘛。」Sophie組組員無論顏值或能力值都高人一等，被視為競爭最激烈的一組！自知在Dating Camp表現遜色的阿Him，在最後衝刺期亦有把握機會向Sophie表達愛意：「我真係鍾意你，我想有呢個機會你可以做我女朋友…或者呢兩日傾少咗嘅嘢，可能之後去做番晒出嚟，係我對你嘅Promise。」最終Sophie宣布淘汰Him，她說畢即為Him除下心動頸鏈，更忍不住流下不捨之淚
李芷晴（Step）亦「爆quota」有三位組員，今集李芷晴組的淘汰同樣催淚，當Step揀了Jacob成為第一位留低組員後，即在Jaden及Kenneth之間猶豫不決；為免女神陷於兩難，之前成功爭取到與女神同房福利的Jaden，竟主動叫Step淘汰自己，Jaden事後表示：「唔想佢難做，不如直接淘汰我，佢唔需要承受咁大嘅痛苦。」對於Jaden甘願犧牲，Step立即哭成淚人。事後，Jaden在IG留言總結這次難忘的旅程，並大讚李芷晴是真女神。今集《女神配對計劃》錄得15.1點收視，比上一集的13.8點收視（89萬觀眾）有顯著上升。
立即更新/下載AM730手機APP 體驗升級功能
