羅毓儀被林俊其超溫柔告白感動。
TVB戀綜真人騷《女神配對計劃》逢周日晚播出，繼第一集曾展望(GM)向葉蒨文(Sophie)勇敢告白贏盡好評後，日前播出的第二集再有面紅場面，就是有「王浩信2.0」之稱的林俊其(Kris)，勇敢向暗戀多時的羅毓儀(Yuki)真情告白，二人的真情互動及粉紅氣氛，令葉蒨文亦忍不住在IG留言感嘆：「好似韓劇男女主角啊，救命！」林俊其雖然一嚟已目標清晰地向心儀女神羅毓儀勇敢告白：「我覺得佢每做一件事都會好驚、同埋都會諗好多嘢，所以就阻住咗佢行前一步。但我想講你相信自己就可以；同埋如果可以嘅話，我想做你輔助。」不過由於 Kris冇開名，女主角Yuki全程除了疑惑零反應，「正義女神」Sophie見狀即出手幫忙撳燈，讓Kris有出場表白機會， Sophie說：「我冇理由唔俾你爭取。」最終Kris在主持林盛斌(Bob)引領下，講出心儀女神是羅毓儀，令全程沒有想過自己就是女主角的Yuki大為震撼：「我依家個心跳得好快，我以為你講緊Step(李芷晴)。」
青澀程度似初戀告白現場
稍作鎮定後Yuki追問：「但你幾時開始…(鍾意我)？我哋都識咗一段時間？」Kris聞言害羞地笑說：「坦白講都有留意好耐㗎喇，直到有次公司大型show見到佢有個位唔夠高拎嘢，佢嗰個動作係咁嘅(說畢即作踮腳趷高伸手狀)，跟住我好想過去幫佢…」並冧爆表示喜歡Yuki成日笑！之後Kris行到Yuki面前、以極溫柔聲線繼續情深告白：「我個人都比較慢熱少少嘅，希望可以慢慢咁樣靠近你，希望唔好好似啱啱咁，一嚟就嚇親你。」全程冧到面紅紅的Yuki，眼泛淚光兼含羞答答回應：「唔會呀，我其實好開心…因為…嗯…er…嗯…係喇，好開心。」說畢更忍不住抬頭以水汪汪的大眼睛望向Kris，至於Kris亦是全程甜笑不斷，青澀程度猶如初戀告白現場，引發全場女神瘋狂尖叫，Yuki則害羞大叫救命：「完未呀？呢個環節！」
曾擔任王浩信替身
由於輪到Kris出場時，Yuki的三個心動名額早已爆滿，為了令Yuki想清楚會否為Kris動用「換人」權利，Kris在阿Bob要求再度作出超動人真情剖白：「因為我覺得Yuki係一個需要多啲陪伴鼓勵，可能佢鍾意睇戲、睇動漫、或鍾意食某啲嘢，我都會陪佢先。我希望之後如果你有好多煩惱，又或者做嘢方面嘅嘢，我會想同你一齊研究、一齊去進步，希望有呢個機會。」令原本已心動不已的Yuki再度失守，Yuki：「死啦，我感動到想喊！(哽咽)其實我唔係好估到，其實我哋叫做冇乜交集，但你好似好了解我咁。」Yuki事後接受製作組訪問時，亦為Kris如此了解及包容自己感動至數度哽咽： 「佢不單止睇得出自卑嘅我，我覺得佢直頭包容咗呢樣嘢，甚至乎係因為呢樣嘢鍾意我。我估唔到會有人鍾意咁樣嘅自己，所以佢咁講我嗰下有啲激動。」最終，Yuki決定放棄只有21歲的康嘉泰，將其中一個位置讓給Kris；而 Yuki上前為Kris配戴「心動頸鏈」時，二人雖然都顯得怕怕醜醜，但期間還是忍不住一再甜笑及甜蜜對望，甜蜜程度完全不輸GM及Sophie。
被封為「翻版王浩信」的林俊其現年29歲，近年獲得公司重用，去年已參演《反黑英雄》、《破毒強人》、《黑色月光》，到最近播出的《刑偵12》亦受到觀眾注意，林俊其至今已加入TVB逾九年，先後在《兄弟》、《反黑路人甲》及《踩過界II》中飾演王浩信的年輕版及擔任替身，又曾在《愛·回家之開心速遞》中飾演「藍浩信」一角。
