姜濤回應墮海事件，承認當下有服食了止痛藥及飲了一些酒。(鍾式明攝)
姜濤昨日(24日)墮海獲救後，今晚(25日)與盧瀚霆(Anson Lo)、呂爵安(Edan)和李駿傑(Jeremy)在麥花臣場館舉行見面會，雖然活動突宣布延期至7月29日舉行，改為安排與四子影合照，姜濤仍如期於凌晨飛往巴黎出席時裝騷。今晚6時許已有姜糖開始聚集於機場送機，隨著見面會結束，大批姜糖陸續湧來，數百姜糖前來送機。
唔想謠言四起
姜濤的座駕於晚上10時16分駛到召開記招的位置，站在對面的姜濤fans不停大喊他的名字。工作人員卸下部份行李之後，姜濤便下車先跟fans打招呼，其後再企企讓傳媒拍照。他說︰「身體狀況冇事，醫生check過，一切都安好！身體都冇咩大礙，所以照出席活動！隻手就有少少受傷，公司都想我抖下，有叫我唔好出嚟，但出面有好多猜測，我唔出嚟謠言四起，係我意願話出嚟。」
跨欄出去放鬆下
他表示昨日「純粹意外」並多謝大家關心。他指當時在發生意外的地點跑步，見到天氣不錯，想坐在海邊，想看看夕陽，加上自己最近有些不舒服，想做運動出下汗，「做咗個唔好示範，跨去欄杆出面」，他稱過去見到有不少人跨過欄杆釣魚，所以自己也想放鬆一下，沒料到起身時有些頭暈，便跌落海。他說︰「係第一次，亦都係最後一次！希望大家唔好……欄杆係有佢嘅功效。」
認曾食藥飲酒
問到是否如報道所言吃了藥加飲酒，他說︰「係啦……有少少唔舒服……所以就……(情緒唔好？) 情緒？情緒無呀，不嬲都……可能大家太擔心我，所有朋友、大家……fans們都擔心……(真係食咗藥？)有，食咗少少止痛藥，因為頭好痛。(飲酒？)少少啦……唔係最大因素，最大因素係自己唔小心，我又好少，唔會借酒消愁，我會打下波。」
姜濤表示不敢再跨欄。(鍾式明攝)
多謝拯救他的人
他表示當時想跨回碼頭時跣了一下，自己掉落水時完全不知道發生甚麼事，到自己發現墮海才醒回來，「好多謝所有撈番我上嚟嘅人！我本身都識水，但好耐無游！本身都驚，無預呢個情況，多謝好多有心人俾個救生圈，我都好抱歉，呢件事佔用好多公共資源。唔使擔心！」他表示下次不敢再跨欄，家人亦很擔心，自己也有立即跟家人解釋事件。
提到今日的見面會取消，他說︰「係公司唔想我哋辛苦，我哋又覺得嚟到唔想fans失望，會擇日再舉行，俾個完整fans meet大家！」他稱公司有安排他放假，其後他轉身向身後的fans表達謝意，揮手及鞠躬，然後與花姐及工作人員離開。