寶珮如自爆難忍初戀男友駱達華同波霸拍戲 入行因為葉子楣？

寶珮如（Baby）今日（16日）到新城廣播接受漢陽主持的《詩歌有Guide》錄音訪問，兩人在節目中除了大談信仰，Baby更大爆昔日入行是因為初戀男友駱達華與性感女星葉子楣拍戲，自己因「呷醋」而背住男友報名參加亞洲電視舉辦的《第三屆未來偶像爭霸戰》，順利進入30強的她，獲周梁淑怡賞識發掘。

寶珮如指當初得悉駱達華和葉子楣拍戲，自己並不信任男友，她稱：「我想check住佢，佢又唔肯帶我睇佢拍戲，我成日奇怪娛樂圈呢份工，點解佢個袋裡面有牙膏、牙刷、面巾同衫，又要半夜三更返工，當時我唔認識娛樂圈，返工唔係要打咭架咩？」Baby指駱達華得知她報名參加比賽後十分驚訝，而自己亦在誤打誤撞下加入娛樂圈。