入行50年的鄭少秋(秋官)在紅館舉行的《鄭少秋半世紀．大時代世界巡迴演唱會》來到尾場，女兒鄭欣宜(Joyce)再做嘉賓，兩人合唱《誓不低頭》後，秋官為Joyce慶祝生日，並與全場觀眾一齊唱生日歌，令Joyce感動落淚。
在慶功宴上，秋官表示今次製作各方面都有支持，所以才得以成功，「無論台燈聲都配合得好好，好多謝製作總監謝家倫，加上自己都搏晒老命！」之後他又多謝欣宜，「為咗支持我而調動自己原有的工作安排，好開心，啲囝囝(孝蟹邵仲衡、益蟹陶大宇和利蟹郭政鴻)同囡囡都好乖，仲有Vivian(周慧敏)！」
自爆老婆乜都管
講到太太官晶華，秋官即刻腦筋急轉彎說：「我老婆乜都管乜都跟住喎！哎呀，唔知講唔講得，一陣講多咗，返到屋企又話我呀！總之有個好老婆就好㗎啦！」秋官又表示演員有責任去好好管理自己，「無論外形、身體狀況、工作條件，例如歌、舞、演技種種，都係本份！」
