張蔓姿新歌《緊張大師》MV邀Locker任男主角。
張蔓姿推出今年第二首派台歌曲《緊張大師》，新歌班底由首次合作的JUDE及小克分別負責作曲及作詞，編曲及監製則是老拍擋Ariel Lai及李一丁。而MV特意找來Gigi好友Locker林家熙擔任MV男主角。Gigi說：「今次邀請Locker做男主角嘅原因係因為本身同佢都識咗好耐，但係就一直冇都試過喺MV上面同佢有合作，加上今次MV內容比較「貼地」，感覺上搵一個大家比較熟悉嘅人去做男主角，大家會容易啲代入到個故事，所以我同公司都覺得佢係最適合嘅人選。」
新歌《緊張大師》是講述現今很多人也有的愛情通病，因過度不安而變成焦慮型戀人。在感情中因害怕失去而不自覺地緊抓對方，甚至讓彼此喘不過氣的矛盾心理。Gigi亦分享：「現實中嘅我其實係比較隨性同埋比較chill嘅人，有好多嘢都會覺得冇乜所謂啦，又或者睇得好化，但係唔知點解喺愛情入面我就會變得比較緊張，我都係會忍唔住咁胡思亂想，但係我又唔會表現得好明顯，總係將所有嘢都放喺心入面收收埋埋，驚被對方發現原來我唔係咁淡定。但後來我學到其實要令到一段關係健康，兩個人都舒服嘅方法係要溝通，要坦白，令到大家都互相明白，如果大家一直都冇向對方表達過自己感受，一直都以為自己咁做係為對方著想，其實雙方都好難受。」
問到Gigi於拍攝MV時有什麼難忘時刻，她說：「今次嘅拍攝都好輕鬆，因為都係喺室內同晚上時間拍攝，再加上同Locker本身都認識，所以等埋位嘅時間我哋都係喺吵吵鬧鬧，我最深刻就係MV入面Locker前女友嚟洗衣店拎返隻熊公仔，然後喺我哋面前撕爛佢嗰一幕，其實我內心係有小小激動，因為我自己本身好鐘意熊啤啤，同埋細個都有幫自己隻熊公仔沖涼，再加上因為當時大家都好入戲，令到我都好快代入到個情緒，我真係有因為隻熊公仔被撕爛而有心痛嘅感覺，直到導演嗌cut之後，我都係繼續呆咗咁企係度。」
Gigi繼說：「其實好開心今次可以喺好有香港特色嘅舊式洗衣店拍ＭＶ，我覺得今次係好開心嘅成就解鎖，因為我好鍾意香港嘅舊情懷，例如之前拍MC《Loser》嘅MV我就揀咗茶餐廳，對於有香港特色嘅地方我係非常之情有獨鍾！所以好希望可以藉住MV同大家分享我嘅歌曲之餘，亦都可以分享我好鍾意又富有香港特色嘅地方。」
