杜德偉今日（17日）在尖沙咀舉行演唱會記者會，好友林敏驄驚喜現身站台。（娛樂組攝）
《杜德偉 GET UP 世界巡迴演唱會 - 香港站》將10月18-19日於紅磡香港體育館盛大舉行。杜德偉今日（17日）在尖沙咀舉行演唱會記者會，好友林敏驄驚喜現身站台，二人同台合唱《點解咁好笑》。杜德偉接受訪問分享相隔10年再開紅館騷的感受，他說：「香港係我第一個屋企，呢一個屋企係我着住牛仔褲T恤周圍去行街，間唔中都會有人叫我影張相，或者簽名。今次喺香港開演唱會，做舞台上面嘅主角，覺得又陌生又熟悉嘅感覺，我覺得今次返香港開演唱會，除咗興奮嘅感覺都多咗一份親切感。」他繼續分享今次開演唱會特別有意義，因為是他入行的40周年。
杜德偉分享今次開演唱會特別有意義，因為是他入行的40周年。（娛樂組攝）
曾獲批紅館檔期竟被撤回大感失望
至於入紙申請紅館檔期是否很困難，他說：「上一次紅館演唱會已經係2015年，之後隔咗三年後，就每一年都有再入紙，入紙入到2025年，之前本來攞咗六月嘅期，但忽然間又話冇咗，就好失望。直至兩個月前又話有期，嗰陣時就好擔心唔知準備做唔做得足夠，但我真係好好彩，我嘅班底都能夠同我一齊出席。」他透露許多圈中藝人跟他分享入紙申請紅館檔期非常困難，並表示：「準則就唔知道點解啦！但係而家有啟德，有好多歌手都開緊，一個大場一個細場，其實都有好多選擇。紅館雖然好難攞檔期，但係好多歌手都係咁諗覺得紅館擁有好多靈魂，有好多歌手喺裏面做過演唱會，有好多（歌手）都已經唔喺度。」他憶述當年曾經與梅艷芳和徐小鳳在紅館合唱過。
講到演唱會的驚喜環節，杜德偉則大賣關子有驚喜。（娛樂組攝）
講到演唱會的驚喜環節，他則大賣關子有驚喜。至於會着那一種顏色的底褲，他說：「我都未決定，好臨時趕急。我都搵返以前用過嘅，有好多歷史嘅感覺喺度，每一條底褲都有keep！今次係咩底褲呢？」被問到會否有脫衣環節，他幽默回應：「仲脫！都已經六十幾歲。我有一首歌叫《脱掉》，所以唔脫唔得嘅，但有一個意識形態會好徹底咁呈現俾觀眾。」他指未知兒子會否上台表演，並透露兒子有學鋼琴和大提琴。提到嘉賓環節，他說：「一路以來所有演唱會都係冇嘉賓，所以今次有冇嘉賓唔係一個問題，問題係咪有適合嘅諗法？如果有嘅我就會擺落去。所以嘉賓特別難諗，要好有意義同埋音樂性。」被問到會否考慮邀請梁朝偉開金口，他回應：「肯定唔得，佢真係睬我都傻，佢一定唔會。」
立即更新/下載AM730手機APP 體驗升級功能
