東張西望｜「假劉德華」遊說3千元買會員卡 破綻百出被事主極速識破
TVB資訊性節目《東張西望》日前報道一名七旬婆婆Helen被「劉德華」和女兒「Hanna」詐騙事件，過程中Helen仍堅信假父女係真，直至「劉德華女兒Hanna」再次放飛機，Helen先表示之後都唔會再理「劉德華兩父女」，事情引起網民熱議。《東張西望》近日再接獲觀眾報料指「假劉德華」又再重出江湖呃人。
「假劉德華」偽稱老婆和經紀人有染
觀眾凌小姐接受訪問，表示「假劉德華」透過Facebook加佢做朋友，對方一開始就叫佢加入會員及支付3千元買會員卡：「我明知你係騙徒，就繼續同你玩。」假劉華向凌小姐表示保證買會員卡後就會去見凌小姐：「佢話我畀咗三千蚊之後呢，佢就會安排下個禮拜安排架飛機過嚟見我嘅。」
假劉華續指自己單身，凌小姐反問：「你老婆唔係朱麗倩咩？」，假劉華隔一陣解釋：「我發現我老婆和我的經紀人有染」，更叫凌小姐唔好講畀其他人知。
由於凌小姐識破假劉華嘅技倆，決定一不做二不休，主動提出付對方一萬元：「之後我就覺得三千元，你身為一個騙徒騙三千元，你看不起我。不如一萬元吧！我就用了很多方法，說不如我給你一萬元吧，我想幫助一下你，可以坐一個頭等機艙回來。」
事主盼市民提高驚覺 勿輕易上當
當凌小姐表示已轉賬一萬元後，假劉華不斷叫凌小姐截圖，但凌小姐扮唔識。假劉華情急下出絕招，向凌小姐傳送語音訊息，該語音訊息更模仿真劉德華嘅聲音；凌小姐一早得悉「假劉華」呃人，就想藉佢嘅經歷提醒大家唔好輕易上當：「報《東張》就係希望唔好咁多人上當，總之一講到錢，十居其九都係騙徒。」
因為「假劉華」破綻百出，唔少網民都留言恥笑，又指自己都好想玩對方；「張學友都話叫你地學好廣東話啦」、「正常人都諗到劉華點會問你借一萬幾千？係得嗰個阿婆咁頑固」、「我都想遇到，真係好好玩」、「哈哈，劉德華同香港人講國語，好風趣喎」、「我係劉華擺時間搵錢好過啦，同啲普通市民傾計把鬼咩」、「只係癲人才相信佢係真，正常人又點會中伏？」等等。
原文刊登於 Yahoo 娛樂圈
東張西望｜七旬婆婆Helen被「劉德華」和女兒「Hanna」詐騙。
ADVERTISEMENT
20周年「全城撐本地消費3重大激賞」！ 即睇活動詳情！
