2025-07-24 16:30:00

東張西望｜67歲婦人Yoyo網戀型男被騙50萬　網民：條路自己揀

TVB綜合資訊節目《東張西望》早前報道一則七旬婆婆被「劉德華父女」呃身家事件，惹起熱議。估唔到事隔一個月，《東張西望》再揭露一單網上詐騙陷阱，67歲嘅家庭主婦Yoyo喺網上遇上自稱任職電腦精算師嘅美男子（名叫陳樂林），對方不時以老婆稱呼Yoyo，更發送性器官照，搞到Yoyo心花怒放，全程投入呢段網戀關係，就算親戚多次勸告都無用，導致背負巨額債務。

Yoyo：發現身份證係假不過冇懷疑過

喺今年一月，Yoyo喺網上認識陳樂林，佢表示對方係一個「靚到『dum』一聲，比明星仲靚仔，首先皮膚白淨」，所以佢已經成個人呆咗。主持人輝仔就問點解靚仔會鍾意你，Yoyo就話：「我就係咁樣自己問自己，佢有車又有樓，又靚仔後生，有乜可能鍾意我？但係佢成日強調話歲數只係數字，唔係問題，仲反問佢你沒有判斷力的嗎？跟住我諗下又係，我幾十歲，自己嘅幸福梗係要自己搵架啦！」之後，陳樂林就發一張身份證照片俾Yoyo，當時Yoyo發現身份證係假，不過就冇懷疑過。

佢哋喺交流期間，男方除咗發送有樣無聲影片及不露面嘅日常工作片之外，仲會蜜甜stickers及只有男方講甜蜜說話嘅短片，而對方就解釋話電話掉進浴缸導致鏡頭損壞，而Yoyo亦選擇相信佢。之後，對方仲發送性器官照片：「佢就發過一張性器官嘅照片畀我，唉，講到我真係心花怒放，跟住我睇到，唉，我話死喇，慾火焚身呀，你知架喇我哋女人，因為我已經係，我可以講話好多年係冇呢樣嘢，咁所以係咪好渴望？如果佢真人真係同你咁樣樣，咁你係咪好開心呀？係咪呀？所以咪一步一步咁樣聽佢講囉」。

Yoyo表示自己同老公已經分床瞓咗20幾年，而同老公已經係有名無實，大家只係同一屋簷下嘅朋友，冇可能再繼續。之後輝仔就問老公知唔知道陳樂林事件，Yoyo就話老公表示唔想知道佢啲嘢。

已經愛得盲目嘅Yoyo，就算姨甥女講俾佢知，呢個所謂嘅陳樂林係盜用整容師兼KOL王明杰嘅視頻及照片，而受害者更加唔止佢一個。王明杰本人亦有出聲明及發視頻以表清白，表示自己冇騙錢，呼籲大家慎防騙子Yoyo仍繼續相信，仲開始多次入錢到陳樂林發送畀佢嘅連結，前前後後入咗50幾萬。當Yoyo表示想取回金錢，陳樂林就多多藉口，始終冇辦法攞返啲錢。

事件曝光後，隨即引起網民熱議，紛紛留言「歲數唔係問題，智商先至係!」、「笑到噴飯事主而家好似回味緊咁, 乜唔係俾人呃之後應該唔開心架咩」、「個姨甥女好機智值得讚賞，個老人家唔清醒都冇辦法」、「真係自己攞黎，幫佢又唔聽，又要鬧返人轉頭，人地隨時做得佢個孫啦，真係無嘢値得同情」、「睇完淨係諗到一句：真係一百歲唔死都有新聞」、「一聽到那男人把死人聲就知道係個大叔啦！」、「幾十歲都唔化，追求愛情咁易咩，貪色都係貪，貪字得個貧」、「呢d 情騙來來去去都係同一劇本真係橋唔怕舊最緊要受」、「好好笑，不過佢老公同姨甥女真係好慘」、「之前個亞婆比劉德華呃，都夠晒經典，而家呢個亞婆仲正！！！67歲純愛戰神」、「主持輝仔都幾好戲忍到笑之餘重一臉凝重樣」、「女主持好野, 忍到笑. 仲要一臉認真聽佢呻. 我笑足全程.」、「笑到噴火！！原來老婆婆還懷有一顆春………夢！」、「主持唔笑先好野」、「幾十歲女人仲咁色迷假象, 講$失感情, 醒未？」、「希望東張播多啲呢類騙案，等啲世人警惕下」及「條路自己揀，人蠢冇藥醫」等等。

原文刊登於 Yahoo 娛樂圈