林保怡和周家怡繼《瑪嘉烈與大衛系列- 綠豆》後，相隔9年沒合作拍戲。(娛樂組攝)
林保怡、周家怡和黃浩然今日出席常霖法師的茶聚活動，介紹親手燒製的陶茶碗作品，其中保怡的茶碗底部有「保」、「怡」的兩字，甚具特色，作品將於9月進行慈善拍賣。周家怡與《瑪嘉烈與大衛系列- 綠豆》(2016年)的前度林保怡和《翻盤下半場》的老公黃浩然同場，她大爆：「本來周國賢(劇集《無人之境》的老公)都會嚟，但佢今日唔得閒，否則3個前度都喺度。」問到「瑪嘉烈與大衛CP」何時再合體拍戲，保怡就答道：「我同佢隨時，(家怡：最重要睇劇本)係啦，唔好再翻炒拍續集之類，就算用返個名都要新啲嘅嘢！」他希望再合作演新角色和關係，「2026年都嚟緊，唔通再做返以前啲嘢，點解觀眾唔睇，因為不停翻炒以前。」
佩服常霖法師洗盡鉛華
談到與常霖法師結緣，保怡自言早在常霖法師出家前，已曾跟當年是攝影師的葉青霖合作，「第一次聽到呢個消息(出家)係唔信，跟住再見面就一個字『服』，佢可以拋棄揸跑車，好fancy嘅生活，就係完全『服』，我都希望盡量放下，尤其是買嘢嘅欲望。」周家怡憶述在慈山寺初遇常霖法師的情境，當時她參加禪修活動，獨自念經時獲對方贈經書，自此認識後，獲對方介紹養成早晚「打坐」和「觀呼吸」習慣，她續說：「當我習慣，整個人就變咗啲。」
踢爆家怡曾是「飛女」
保怡聞言即驚訝反駁，「乜變咗啲，以前周家怡唔係咁，所有政府宣傳叫人唔好做的不良習慣，佢全部做晒。」被踢爆的家怡掩嘴笑到彎腰，她直認，「我哋好早就認識，咁時係曳嘅。」問到有幾曳時，保怡就爆料，「飛車啦，揸車好快，有時收工，轉眼就連燈尾都見唔到。佢嗰時係『飛女』！」家怡強調已成為「安全駕駛大使」。見證周家怡改變的保怡認真表示佩服，「佢個人真係齋晒，我仲未得，有時會諗吓食雞脾，魚生。」他笑言收過家怡傳來的「沉浸式體驗劏豬」短片，睇到怕怕。
風光背後 冇戲拍
談到生活最大煩惱，保怡即表示，「無錢囉！呢排無戲拍，大家都坐喺度。」家怡慨嘆，「唔好以為藝人好風光，但藝人出嚟見人，個樣唔可以太衰。我哋做呢行冇固定收人，其實我好羨慕每個月有人工嘅人，有穩定收入。」保怡補充說，「演員好被動，唔知幾時老細肯開戲，又唔知劇本角色啱唔啱你，有冇人搵你。」周家怡新劇《翻盤下半場》現正播出，她演的角色「蒙美」獲不少觀眾喜愛，「其實我都幾鍾意呢個角色，因為傻，永遠估唔到佢下一句係咩，破產咁大件事，佢會唔開心，但唔會好似一般人咁擔心。」她大讚歐鎮灝(George)做足準備又熟讀劇本，而且賞心悅目，與黃浩然一樣靚仔，3人很有「家人」感覺。
林保怡、周家怡和黃浩然親手燒製陶碗作慈善義賣。(娛樂組攝)
怕人多 避出街
作為「心呼吸大使」的周家怡靠打坐和「觀呼吸」調節心情，「因為世事有好嘢都唔能夠改變，但打坐會令你少咗擔夒嘅聲音，否則呢啲聲音就會成日嚇你：『死喇，你未有嘢做，點算？』」保怡自言沒有打坐，通常需要長時間，靠自己調節，他自爆越來越少出街，「我開始怕多人嘅地方，如果我無目的行街shopping就唔得，(買餸如何？)買餸已習慣，大家都係熟人，每次老闆都會回俾我。但陌生地方就唔得，我試過去首映，已泊去車，但見到一大班人，主角又做緊訪問，唔知點同佢打招呼，我真係自己決定揸車返咗屋企。」家怡聞言非常擔心，力勸保怡要認真跟進，「因為擔憂好似種秄，如果你唔理就發發芽成長，就會越嚟越多嘢驚。」保怡就表示會聽音樂令心情平伏。
立即更新/下載AM730手機APP 體驗升級功能
