JACE陳凱詠擔任林家謙《White Summer》演唱會嘉賓，合唱《隔離》補3年前遺憾。
林家謙於紅館舉行的《White Summer》演唱會昨晚(20日)舉行第二場，請來陳凱詠JACE擔任嘉賓， 上次《Summer Blues》演唱會JACE因檔期問題，未能親身擔任嘉賓，只能透過視頻隔空對唱，今次終可真人現身合唱，補圓3年前未能同台合昌「《隔離》的遺憾。JACE大爆被「臨時急召」的舊帳，公開爭取家謙做MV男主「還債」。事後，她在社交平台發文分享感受，再次提醒家謙，「下首歌都已經準備好，你係會做我MV(男主角)唔會走數㗎嘛？」
JACE登場與林家謙合唱《四月物語》後，投訴被林家謙「臨時急召」做嘉賓，「好驚呀！第一次做你嘉賓，可唔可以咁講，但邊個臨時臨急，得一個禮拜通知我做嘉賓？一個禮拜通知都冇！搞到我鬼死咁緊張！」被JACE公開算帳，林家謙表明責任不在自己：「哈哈....問Alex(演唱會監製)啦，呢單嘢唔係我跟開！」Jace聞言即反擊：「下，你射走（卸責）？」家謙搞笑回應：「係咪想摑我兩巴？」兩人互動盡顯好友默契。
JACE繼續「翻舊帳」：「你成日搵得我好急㗎！《四月物語》都係突然間……」家謙即感謝：「係喎，要多謝你做我《四月物語》MV主角，搞到view數高咗！」Jace順勢邀約合作「找數」，她笑言，「你有冇睇我新歌 MV，我下隻歌好斯文下，你幫返我手做主角啦！家謙做主角我多啲人睇，大家係咪呀？」家謙卻自嘲演技差，反問JACE識玩：「你對我係咪有咩誤會？我指演技方面啊……哈哈....唔應該搵我做戲！依家啲人上紅館，都係用群眾壓力叫人幫手，識玩呀你！」JACE隨即宣布，「我識呀，我都準備……開紅館！」隨即引發全場歡呼拍掌，接著兩人再合唱《隔離》。
JACE陳凱詠擔任林家謙《White Summer》演唱會嘉賓，公開爭取家謙做新歌MV男主角「找數」。
完騷後，JACE在社交平台上載擔任嘉賓的合照，寫道，「三年前無得同台，琴晚同台唱返呢首歌(仲要其實自己都好耐無唱《隔離》)，發現自己都好耐冇拎呢一個面向見大家（所以突然又好緊張）」她續道，「呢段時間一直好俾心機想製作各種唔同好玩嘅音樂，過兩日都會推出大碟嘅上部分REVOLVING: UP將成果分享，但多謝 林家謙嘅邀請，係依個時候唱《四月物語》同《隔離》似乎正正就係best timing，提醒我走返去自己唔太面對但可能大家都比較熟悉嘅另一面了。」最後，她不忘再度提醒老友找數，參演其新歌MV。
立即更新/下載AM730手機APP 體驗升級功能
