2025-06-09 12:40:00

柳應廷Jer相隔5年再busking掀回憶殺灣濱個半小時唱足14首歌(有片)

Jer柳應廷日前於灣仔海濱舉行《大人之後 - Live Togather》busking。(娛樂組攝)

MIRROR成員柳應廷(Jer)前晚(7日) 9時在灣仔海濱舉行《大人之後 - Live Together》，這是2020年在尖沙咀海傍後再次busking，現場約有逾千歌迷聚集，場面墟冚。Jer在演出前受訪，「好多fans係見面祭同我講，今次最後一次追你，勁唔開心，話冇錢入場買飛，唔緊要，我就搞多啲免費。」問到可會巡迴不同地方busking，Jer坦言，「想就咁想，但要諗諗。呢啲係結構性嘅問題。」其實今次大型busking，籌備多時，他坦言甚至未必有下一站，「想啫！呢啲要同公司傾，睇下大家反應點先！」

Jer柳應廷相隔5年再busking，現場逾千fans坐定定聽歌，場面墟冚。(娛樂組攝)

「縮沙」唔著背心

相隔5年再busking，別具義意，不少fans提早到場霸位，有fans於上午9時許已到達，在酷熱天氣下，甚至連燈牌都曬溶。Jer在TG群組貼心地提示「柳柳粉」(fans匿稱)要多飲水，fans亦叮囑他別要穿長袖衫演唱，Jer幽默回應，「睇嚟要唔著」，又笑言要穿「大隻佬背心」。不過當晚他卻短袖T-恤上陣，他解釋，「背心喺我個內心度……」被再三追問後，才尷尬直認，「我係縮沙！多謝！」問到如何回饋fans時，他笑言會唱多幾首，在fans熱烈要求下，他額外encore兩首，一共唱了14首歌，到大約10時半才結束。

「大抽嘢」出場

Jer以「歡迎嚟到Jer仔music live。」作開場白，接著他將身後的器材搬到面對，「唔好意思，比較大抽嘢…」引來哄堂大笑聽到現場傳來一片笑聲，他才補充︰「我指音響！」而站在他背後的葉崇恩(Patrick Yip)，正是2020年7集《Jeremylaous Music Live》的戰友，亦是《不要活成自己討厭的模樣》的編曲人，這個組合對較資深的柳柳粉而言，滿滿回憶。Jer甫開始已明言，「今日準備一啲歌，唔似平時演唱會咁，放心，有我嘅歌！但亦有好多自己一直想唱嘅歌，同埋一啲朋友叫我唱嘅歌。Busking嘛，唔係一定要唱自己歌。」

Jer柳應廷深知fans花了不少金錢搶飛睇騷，特地舉行busking與大家近距離接觸。(娛樂組攝)

籲fans多愛錫自已

在夜空下busking，Jer以Moon Tang的《夜闌人靜》打頭靜，緊接唱陳奕迅旳《我們》，帶大家進入他的音樂世界，當唱自己有份作曲的《不要活成自己討厭的模樣》前，他表示這歌是用來鼓勵自己，「可能現場好多人都因為工作，長大做一個成人後，好似有時要犧牲自己，去成全呢個世界要你做嘅嘢，我覺得好辛苦。呢首歌鼓勵大家，千祈唔好做一個內耗、自己都唔鍾意自己嘅人，愛自己好緊要，希望你哋鍚自己多啲，你哋對於好多人嚟講好重要，千祈唔好覺得自己唔重要。」唱畢，Jer不忘補充：「希望你哋都好似呢位小朋友咁(歌詞「來撫心自問仍能如孩子笑著睡」)，永遠都可以活喺天真之中，多謝。」接著他飲水時，被問到吃了飯沒有，他笑言只吃了午飯，「因為食咗飯會『嗝』(氣)，會有胃氣。」

首唱live版《走》

接著，他連續唱了多首cover歌曲，包括MC張天賦的《說謊者》、陳健安的《戀愛腦之死》、恭碩良的《月球人》，當唱完Supper Moment的《P.S. I Love You》時，他笑言，「再戴黑框黑鏡和留鬚都應該carrry到(《全民造星》55強的造型)」即被fans追問幾時實行，他推說要再機會。接著介紹下首歌曲，「我睇返條片係10年前，一嘢就過咗，依家幾多歲就唔講，18歲！(fans回應：3歲)，他繼續介紹，「以下呢首歌有好多在Patrick的留言區點唱，呢首歌叫《走》，係由一隊band叫『咖啡因公園』的作品，係我以前夾band時結他手嘅老師，有次機緣巧合去睇佢哋個騷，覺得好好聽，同埋好能夠形容當下心情，所以10年前喺一個黑白mon，拍咗一條cover片，好耐冇唱，亦冇喺大家面前唱過。」一個接一個的回憶殺，全場興奮歡呼。

大合唱清唱版《人類群星閃耀時》

接連唱了多首cover作品後，Jer送上新歌《大人之後》，他大讚柳柳粉的應援很高質，在座有好多畫畫奇材、應援奇材，製作品專業到可作商品發售，他語重心長表示，「希望大家都會努力咁去搵自己心裡面嘅夢想，希望你哋相信內心嘅自己，你哋好叻，加油，人生唔好俾自己有後悔，點解我想做就做，因為唔想回望，自己後悔。」接著他唱許廷鏗的《停半分鐘聽一闋歌》，最後以兩首自己的作品《大海少年》和《人類群星閃耀時》作壓軸，fans亦自動自覺大合唱，場面溫馨。向來喜歡聽現場大合場的Jer，特地拿出手機拍片，請大家在沒有音樂伴奏下大合唱《人類》的副歌，為busking畫上圓滿句號。他承諾會在社交平台開心share，完騷即po片，果真「找數真漢子」。

小伙子變大丈夫

不過，fans仍高呼未夠喉，Jer在徇眾要求下，回望後面多次搖頭的花姐，最終不敵fans的熱情，在點唱下唱出solo出道作《水刑物語》，面對不捨離場的柳柳粉，他表示，「希望做多啲近距離的演出，或者可以開多啲show，入嚟睇我嘅show，就可唱晒我嘅歌，(fans問：幾時？)幾時？好近我生日嗰啲！」最後，他送上陪伴他成長的歌曲《小伙子》(Supper Moment原唱)，他更豪氣自稱現已「大丈夫」，並溫柔地叮囑道：「真係最後呢首，唱完要返屋企瞓覺。」在見面祭後，獲Jer賜新名「粉粉」的fans，全程都自律地乖乖坐著，以免阻礙後排觀眾視線；busking結束後亦有秩序地離場，有部分「粉粉」更自動自覺協助清理現場，值得一讚。不得不提是忠實「粉粉」吳林峰亦有到場支持戰友，還拍片打卡，上載IG story寫道，「邊個唱緊歌，幾好聽。」