娛樂
2024-07-10 15:13:13

梁釗峰為新歌《致陪伴我的》拍MV遇狂風暴雨 被迫腰斬獲同事奮力保護感心痛

分享:
梁釗峰走入元朗農莊為新歌《致陪伴我的》拍攝MV。

梁釗峰走入元朗農莊為新歌《致陪伴我的》拍攝MV。

梁釗峰因跑山經常走入大自然,今次他走入元朗農莊為新歌《致陪伴我的》拍攝MV。拍攝當日遇上三度黃雨的極端天氣,狂風暴雨下拍攝腰斬,最令釗峰心痛的是眼見同事全身濕透,卻依然奮力保護自己以及攝影器材的畫面。釗峰坦言經歷過後,陪伴自己的人變得更加重要,他說:「有一班戰友撐住自己,會用心、用歌曲去多謝佢哋。」

《致陪伴我的》講述單純的陪伴,對象可以是親人、朋友又或是鄰居,而陪伴釗峰拍攝MV的就是一隻可愛小狗,而且一拍即合,玩得非常開心,小狗更興奮得不斷親吻釗峰。釗峰表示MV導演吳詠琪(琪琪)想帶出,即使只有小狗陪伴露營,他也不會感到孤單。他說:「因為平時好多人陪伴住我,帶住好富足嘅心態,自己感受大自然。鏡頭前得我同狗仔,但鏡頭後有好多人陪住我,佢哋都餵緊蚊,為呢件事付出好多。心存感恩,感激陪伴。」拍攝當日天氣不穩,製作團隊把握時間拍攝釗峰駕車以及與狗狗露營的戲份,期間已不時下雨及行雷閃電,令拍攝進度受阻,到接近黃昏時間,現場突然刮起狂風暴雨,更將團隊設置的巨型帳篷、雨傘全部吹倒,器材、拍攝道具散落一地,現場一片混亂,工作人員不惜冒雨留守現場奮力保護器材。極速被安排上車等待的釗峰憂心忡忡,並說:「而家好大風、好大雨,同事全部喺晒出面,我就喺架車度避雨,好灰,因為佢哋要撳住啲遮,全部人濕晒。」他自責表示:「我好想救佢哋,點解我唔揸7人車!都唔知場雨落幾耐,同埋啲機器唔知點算。」拍攝腰斬後,釗峰得知同事陸續安全離開現場,才稍微放心說:「個MV拍唔到唔緊要,可以補錄,但就好唔開心、好唔好意思。同事為咗保護器材淋雨,全部濕晒,我又愛莫能助幫唔到啲咩。但佢哋好正面,有啲仲喺度Chill,我覺得我啲同事好勁。」他心痛續說:「我髮型師唯一敲窗唔係上車,係問電話同電子產品可唔可以擺喺我度,我話梗係可以啦!」釗峰事後在IG限時動態形容當時的情況就如十號風球一樣,他感激所有痛錫自己的同事以及MV手足,說:「辛苦晒,有你哋我應該係幾生修到。」

adblk5
拍攝當日遇上三度黃雨的極端天氣,狂風暴雨下拍攝腰斬。 取景當日天氣惡劣。 拍攝腰斬後,釗峰得知同事陸續安全離開現場才告放心。

MV拍攝的第二日,主力拍攝釗峰與山和水的畫面。當日陽光普照,氣溫更高達34度,酷熱天氣下戶外拍攝,釗峰卻開心說:「上次大風大雨得好緊要,心入面唔舒服咗好多日。慶幸今日放晴,多謝天公,真係要感恩!」釗峰身穿的T-Shirt有少許污漬,他解釋是第一日拍攝時狗狗留下的腳印,連戲之餘亦令整件事更貼近「自然」主題。

《致陪伴我的》由Kudos Lam作曲填詞,並與監製蘇道哲共同編曲,釗峰說:「本來想搵填詞人,但KudosDemo詞轉少少已經好啱Feel,所以搵埋佢填詞。」完成「遺憾與遺憾之間的一切」企劃後,釗峰一直希望做一首舒服、輕鬆的歌曲。他說:「我做到啦!新歌不論把聲、心態,歌帶出嘅訊息都好輕身、好輕鬆。」另外,新歌宣傳照上「致陪伴我的」五字原來是出自釗峰手筆,他笑指畫功向來「出色」,亦試過於MV中執筆,卻被同事直斥其醜。但導演琪琪依然想釗峰嘗試題字,他笑說:「我唔驚㗎!大家接受到就得。」他鬼馬輕聲說:「5個字我花咗兩個幾鐘,不斷修改再寫,出到街大家唔好笑,係肥大啲但Cute Cute嘅,希望大家感受到我嘅誠意。」

adblk6
釗峰抱可愛小狗一同拍攝。 釗峰到元朗為新歌《致陪伴我的》拍攝MV。 釗峰到元朗為新歌《致陪伴我的》拍攝MV。