2017-09-08 06:00:00

由東京行去鹿兒島零CG奇幻災難片

「末日論」電影，幾廿年前已經有人拍，
《天煞地球反擊戰》、《絕世天劫》、《明日之後》、《28日後》……
嚟緊又有部《人造天劫》，戲中導致末日嘅原因，離不開地球以外生物、異種佔領地球，
又或者大型天災(然後解釋成人禍)，而電影亦大多花一半(或更多)篇幅解釋末日何來，
拍攝方式離不開綠幕加後製、CG(特效)。有幾可有災難片係零CG製作？
有！真係有！只要原因夠貼地、夠埋身，就有。
文：Wing Lam

批判社會
日本導演矢口史靖新作《求生走佬FAMILY》，至截稿前，全球得3個地方公映，一個係日本(今年2月)，一個係台灣(今年4月)，另一個就係香港。矢口知名作品包括捧紅妻夫木聰嘅《五個撲水的少年》、《喇叭書院》及《戀上春樹》。一向擅長拍青春片嘅佢，舊作大部分講年少懵懂、熱血追夢，但主題外，副線其實滲透強烈社會性及批判性，如《戀》中被邊緣化嘅林木業咁。《求生走佬FAMILY》可以話係矢口最開宗明義批判社會嘅作品，用一次東京不思議大停電，表達對東京嘅不滿。

問卷調查：東京停電你會點？
《求》片假設東京發生大停電，冇網絡，冇暖氣，冇電話，冇燈，冇煤氣……主角係由小日向文世加深津繪里領軍嘅一家四口，老竇保守兼自以為是，阿媽默默做家務做足大半世，阿仔返屋企聽歌多過聽人講嘢，阿女玩電話玩到天昏地暗，一家四口，一知停電即場崩潰。此片靈感來自2003年、影響逾5,000萬人嘅「北美大停電」，而啟發至深嘅畫面，就係一班人喺布魯克林橋行車線度漫步。橋，已經有，但主角一家四口應該有咩城市人特質呢？導演最初用「如果東京大停電你會點？」呢條問題做咗個問卷調查，發現年輕人同50歲以上成年人嘅答案差得遠，年輕人一聽到停電，當然仰天長嘆一聲「金翅大鑊鳥」(高登mode)，反倒年紀較大嘅就覺得生活可以自給自足，使鬼靠電咩？！

導演實測　邊個話冇可能？
導演矢口為咗拍攝最真實嘅「東京逃生記」，拍攝前索性自己行一趟戲中嘅「走佬路線」──由東京行去鹿兒島，而戲中主角經歷嘅重重難關，相信亦來自於導演親身體驗。其中一幕講述一家四口，捱咗幾日肚餓，一見野豬群就想撲過去捉，即煮即食。片中飾演老竇嘅小日向文世，唔止行到鞋都爛兼濕身，仲喺冇替身冇CG之下，親身上陣親親大野豬，期間仲不幸受傷撞傷肋骨，而且仲人生如戲，導演直接將受傷戲變成電影情節，真係每幕戲都有血有汗。