羅家英冇買保險，4度患癌獨力承擔醫療費 。
現年78歲的羅家英早前驚爆第4度患上癌症，最多剩下8至9年壽命，但他表示「不怕死」堅拒做化療和電療，現時需定期檢查兼打女性荷爾蒙針控制病情。羅家英日前接受好友查小欣的YouTube頻道「紅查館」訪問，分享4度患癌的心路歷程，更自爆已5年無性慾。
羅家英堅拒做化療和電療，他表示並非放棄治療：「我唔係唔醫，佢呢就唔係咁樣醫法嘅。我就去檢查咗，用嗰個同位素就照到我腹腔盤腔呢，有一點點一點點咁樣，得10粒8粒。」他提到04年確診肝癌第3期時，發現一粒荔枝咁大粒的東西在肝臟位置，當時切肝保命；到2014年並非復發，而是發現肝臟另一個地方再多個荔枝般大的腫瘤，又再進行切除手術；直至2019年，羅家英前列腺組織發現有癌細胞，又再切除前列腺，但原來一直有壞細胞潛伏在附近，「係未曾成形嘅，佢自己慢慢成形，到而家佢成咗形喇，咁先知道。但佢有成咁多粒喺度，係切唔到啦，你都唔知點醫，醫生話得一個方法，就係打女性荷爾蒙。」
羅家英自爆為治療花了不少積蓄，但沒有叫老婆汪明荃幫手。
羅家英指打女性荷爾蒙針可以抑制癌細胞擴散，但不能消滅它，他説：「醫生話大概8年度啦，你等佢一路撳住佢，但唔係消滅佢，唔係醫治佢，等佢平和，但8年之後就壓唔住㗎喇。咁壓唔住要點呀，就要電療同化療。既然咁樣喇，我今年79歲，8年之後我都八十幾啦，電療化療之後，你畀多三年我呀，咁我嗰時都人唔人鬼唔鬼啦。」所以羅家英決定不做任何電療和化療，並決定在這8、9年內盡情吃喝玩樂！
不過，注射女性荷爾蒙令羅家英的身體亦有變化，更自爆性慾全失：「個人弱咗，好容易眼瞓，好攰，好唔鍾意講嘢，而前列腺切除咗之後，我個人定咗，淡咗，對於嗰個色字，（即係性慾淡咗？）係喇，冇呀，仲打埋女性荷爾蒙添，更加冇，慣咗，已經4、5年。」
香港醫療費昂貴，四度患癌的羅家英自爆沒有買保險，而為治療更花了不少積蓄：「割，最緊要一樣嘢係，你有冇錢？ 我唔信保險，唯有儲埋儲埋囉，咁我以前都知道，我冇保險，我一定要有啲積蓄，咁咪使咗佢囉，第二次我又使咗佢囉。」他續指未算花盡積蓄，亦沒有叫老婆汪明荃幫手：「我冇叫到老婆幫我，我唔使佢幫呀，千其唔好同佢講呢樣嘢，佢亦都冇講過話幫，佢知道我有，（你啲性格唔俾人幫！）唔係，如果佢願意幫我，我都好樂意嘅。」
ADVERTISEMENT
第3輪消費賞開始！勁送iPhone / 冷氣機 / BB車 / 空氣清新機！
