娛樂
2022-05-25 13:40:49

聲生不息 | 曾比特出道後輸MC兼被炒魷 當年短髮look娘爆!(有圖)

分享:

曾比特

《聲生不息》播出以來,出道第2年嘅曾比特應該係節目大贏家。去年出道嘅Mike,遇著其餘2位同佢一樣都係《全民造星》出身嘅「校友」Edan 呂爵安及MC張天賦,雖然力保新人獎三甲,但聲勢總比前兩者爭少少(甚至連Chill Club頒獎禮都輸俾193……)。不過因為唱片公司緣故,曾比特有機會透過《聲生不息》北上發展,甚至因為節目喺內地爆紅,可以話係後發!

有睇節目都留意到,28歲嘅Mike國語唔錯,原來佢喺內地汕尾出世,童年時移居香港,可惜爸爸早逝,Mike同媽媽、哥哥及家姐生活。中學時已經想做歌手嘅Mike,參加過無數個歌唱比賽,喺其中一個學界比賽拎到季軍,而嗰界嘅冠軍係《殘酷一叮》「莫生」莫凱謙,得獎者仲有《造星3》嘅陳葦璇同雲浩影(Cloud)!

右二係Mike,同屆得獎者仲有《造星3》Cloud(左一)同陳葦璇(左二),《殘酷一叮》莫凱謙(中)係比賽冠軍。

聲生不息︳曾比特短髮look曝光!

出道後仍返全職 最後竟被炒魷

Mike參加咁多比賽都係想得到入行機會,終於喺2019年參加《全民造星II》打入決賽,最終得到第8名。比賽導師之一Eric Kwok非常欣賞Mike,將佢引薦俾環球,仲為佢打造首支單曲《我不如》。

眾所周知,做歌手出道初期落袋嘅唔多。曾比特成為歌手之後,仍然做全職音響技術人員兼教唱歌,用嚟幫補開支。但因為歌手工作時間唔穩定,Mike結果連音響工程份工都冇埋。查實入行前已經相當識諗,做婚禮歌手寓工作於娛樂,又試過做中環海濱嘉年華散工,聖誕節睇住人拍拖自己就開工,難怪Eric Kwok安排佢專攻慘情歌。

原文刊登於Yahoo娛樂LOL,am730獲授權轉載

隱私權保護政策
請細閱並示意接受以下私隱政策及免責聲明,按下「接受」表示你已同意並願意接受 am730 網站內之私隱政策及免責聲明。了解更多
接受