黃峻𤋮新歌MV《不如出走》搵沈震軒做導演 。
樂壇男新人Heize黃峻𤋮繼出道作《拖多幾百天》後，今日（20日）再推出第二首派台作品《不如出走》，繼續冧盡GenZ粉絲。新歌延續浪漫風格，但甜蜜升級，玩「私奔出走」。年輕情侶不理世俗眼光，說走就走，直飛天空宇宙睇星宿，隔住個Mon都覺得甜到漏。
Heize指《不如出走》並非講經歷，是講「性格」。
出道歌曲MV找來師兄洪助昇（Aiden）執導，今次又請到同公司師兄沈震軒（Sammy）擔任MV導演！看來小師弟認真得人疼錫，Heize笑着說：「兩位師兄都非常之錫我，尤其是今次，Sammy俾咗好多鼓勵令我輕鬆啲，又指導我點樣拍、點樣放鬆啲去做。」又謂經過上首歌的經驗，今次拍攝十分順利。提到最難忘時刻，Hezie提到最後一個Shot，「喺個帳篷入面，係一個好偏僻嘅地方，有投影機，自己本身冇乜點試過有呢啲咁浪漫嘅情景，所以對我嚟講係幾難忘，同埋真係幾靚嘅。」
黃峻𤋮第二首派台作品《不如出走》，繼續冧盡GenZ粉絲。
至於新歌內容有否加插自己經歷，Heize指今次並非講經歷，是講「性格」，「我性格係嗰種話走就走嘅『私奔類』人格，我唔會理咁多人哋講嘅嘢，所以我覺得係首幾霸氣嘅歌。」
另一邊廂，問到首次執導其他歌手MV，跟拍自己歌的分別，Sammy爆笑回應：「最大分別係我會舒服好多，因為我兼顧嘅嘢可以少啲。唯一唔同嘅就係我唔使理自己個樣，唔使理自己嘅演出，就可以完全投入去導別人嘅演出！」
立即更新/下載AM730手機APP 體驗升級功能
