許冠文獲頒授榮譽社會科學博士。(吳康琦攝)
現年82歲的許冠文今日(3日)出席香港恒生大學第五屆榮譽博士學位頒授典禮，獲頒授榮譽社會科學博士，太太、兒子，孫仔孫女均有出席見證重要時刻。典禮期間，當常務暨學術及研究副校長莫家豪教授宣讀讚辭時，概述許冠文從影生涯，當提到《破·地獄》角色「Hello文」時，全場拍掌歡呼，可見角色深入民心。
他於典禮後接受傳媒訪問，表示很開心可以在孫仔孫女面前「行個圈」，並跟他們說日後會到他們拿博士。他又稱現時很多人叫他「Hello文」，自己也覺得很有意思，他說︰「以前拍啲戲大家覺得幾好笑，今次就唔係，個角色乞人憎，但就提醒大家爸爸都係咁上下樣，令大家對爸爸、上一代都孝順咗。同埋呢次我做，同以前做啲戲唔同，其實我爸爸就係咁，咩都唔講，淨係拍枱，佢唔係唔愛我哋，係擺喺內心，大個咗先知。再推論落去阿爺個代仲勁，其實一代一代開放落去。」
許冠文開心電影《破．地獄》令大家改變對上一代的睇法。(吳康琦攝)
《七俠蕩寇誌》影響自己最深
許冠文稱當初讀社會學時，沒想過這科會幫到他在電影上的發現，「你睇我啲戲係好地道，好大眾化，其實係讀社會學時候，已經潛移默化係跟大路走。同埋我好知道，電影可以影響一個人好緊要，尤其是我。我發覺我個性格、想法、對人生希望等等，係受我15至17歲睇個十套、八套戲影響，每個人都係，個啲英雄就係你嘅英雄，你就會跟住佢走，大家價值觀都係咁上下。我覺得電影係有社會責任，唔係深係娛樂咁簡單，因為對人係有影響。以前我唔信，我依家更信，電影係影響一切，因為自己由細睇到大。」
他續指《七俠蕩寇誌》帶出瀟灑人生，如何看待英雄主義，他更提到主角尤伯連納（Yul Brynner）其中一場戲帶出的英雄觀，影響了他的一生。
如人生重來會選修電影
他表示自己當年只是沒有錢交學費而加入無綫電視，誤打誤撞入行，而自己發現演藝事業可以影響世界才繼續發展。他說︰「如果生命可以行多一次，我一定會去讀電影，都會副修社會學。因為唔使諗咁耐，嘥咁多時間，有啲基本嘢，人哋兩、三年讀晒，我就要諗好耐。」
孫仔孫女未有計劃拍電影
他續指近年的作品有好成績，全因為導演或演員都係學院畢業，「佢哋係正統畢業，諗嘢諗得深啲，呢個係香港充滿希望嘅地方。」問到孫仔、孫女有沒有想修讀電影，他直言「無！唔知點解喎又，又無話想做電影，唔知係咪喺我面前唔講想做電影。好難講，人好似三文魚咁，到最後硬頸都無用，你整整下潛意式又去番嗰度。就好似三文魚咁，永遠都係游返上去嗰條河度。」
許冠文表示孫仔們沒有意思加入電影行業。(吳康琦攝)
立即更新/下載AM730手機APP 體驗升級功能
