許廷鏗被連爆𤓓事 鄧小巧擺謝茜嘉棚牙擺落口

由鄧小巧主持的網上音樂節目《Singaholic》第一集昨晚（22日）正式於冤枉娛樂YouTube Channel上架，顧名思義節目是一邊唱歌一邊飲cocktail，首集小巧便請來同是「巨聲幫」出身、相識十四年的好友許廷鏗（Alfred）任嘉賓，二人唱了多首歌曲，包括小巧新歌《瀟灑》、《微時》、《最壞事活多天》、《Say Something》、《原罪》、《空港》、《Never-never Land》、《可惜你是個人》、《荒廢之綠洲》及《大雄》。

節目一開始，小巧便解構節目名稱，「我又鍾意Sing啦，但我又唔可以叫自己做Alcoholic嘅……」話口未完Alfred便玩踢爆，「你係呀，你睇吓你拍個節目，側邊……」然後便指着旁邊的酒吧setting，原來節目知道小巧喜歡喝酒，便特別請來一名調酒師為歌手們調酒，認真有心思，「同事問我鍾意飲乜嘢酒，我都list咗四、五杯出嚟，飲啖先開始。」

隨後Alfred笑問為何請他任首集嘉賓，「係咪因為我幫你整完牙，所以你請我做第一集嘉賓當回禮。」一提到牙齒便立即觸動小巧神經，決定爆料︰「嗰陣佢俾咗個牙套我漂牙，我帶咗番加拿大，我帶咗下面嗰個，perfect fit！但一帶上面嗰個，棚牙唔係我㗎喎！哈哈！個牙套唔係我㗎，係邊個㗎呢？係謝茜嘉㗎！哈哈哈！然後我攞咗個模出嚟，原來謝茜嘉棚牙係咁㗎！你幾認識一個人你都唔會將佢棚牙擺喺你個牙度，但係我將謝茜嘉棚牙擺咗喺我度。」期間，Alfred已經笑到喘不過氣來，然才說：「放心，佢未帶過嘅嗰陣時，新嘅。」

意猶未盡，小巧繼續大爆Alfred醉酒瘀事，「當時嘅許廷鏗仲係一個三字頭嘅巨星，喺旺角一個慶功宴上，當大家飲到興高采烈嘅時候，由於許廷鏗一直都係一個不勝酒力嘅偶像，嗰晚大概佢一個人獨自俾人灌咗一支以上嘅香檳。我冇份嘅，我知佢真係唔飲得，因為好耐《巨星》之前，佢因為飲咗唔知一杯定兩杯嘅cocktail，入咗廁所『分泌』番一啲酒精出嚟。」說到這裏，Alfred便打斷小巧，「你講到文縐縐反而核突咗喎，哈哈！『分泌』一啲酒精出嚟喎大佬！呢句點出街呀？」

小巧續說：「嗰陣慶功，全部樂手、嘉賓、工作人員都喺度，佢處於一個乜嘢嘅狀態呢？趴咗喺飯枱上面，然後飯枱有灘水，嗰灘水係咩呢？係佢嘅口水！因為佢太醉啦！工作人員要拉佢返屋企，抆佢起身嘅時候，啲口水會點呀？『拉~ 絲』維加斯，最後要連埋個冰桶同佢一齊上保姆車，因為佢要嘔住返屋企。」Alfred坦言自己「斷晒片」，而且十分後悔，「因為嗰度唔係淨係得主辦機構，仲有啲客戶喺度㗎大佬。」首集於一片爆笑聲中圓滿結束。