鍾嘉欣日前接受鄭裕玲嘅商台節目訪問
鍾嘉欣2015年閃嫁脊醫老公Jeremy Leung迅速做媽咪，十年間已經生咗兩女一仔。早前鍾嘉欣由加拿大回港為林峯演唱會做嘉賓，同時推出新歌及拍廣告。Linda日前接受鄭裕玲嘅商台節目訪問，宣傳新歌之外仲談及「生仔經」，講得相當仔細。
鍾嘉欣提到自細已經憧憬結婚生仔，但因為加入娛圈而令佢以為夢想難以成真，但突然間遇到Jeremy，於是勇往直前爭取幸福。鍾嘉欣話當時唔驚TVB詐型，而且認為合約冇話唔俾結婚，計過數又發現已經爆咗show，於是飛去溫哥華同Jeremy 結婚。鍾嘉欣直言因為老公年紀唔細，自己當年都31歲，「結婚就可以生仔架啦，咁咪生囉。生完一個又一個，好事嚟嘅，嗱嗱臨搞掂，咁你之後咪可以relax囉。」
曾以為結婚生仔夢難以成真
本來鍾嘉欣想生夠4個，但生完第3個之後就發現因為係自己湊仔會「攰到一個頂點」，加上「養兒一百歲，長憂九十九。我要做3個喎，已經300歲，再多個就400歲，我搞唔掂」，於是決定封肚。鍾嘉欣3個小朋友都係順產，佢話生完第一胎之後要較長時間恢復，「我行路有啲唔方便，因為我裂得好犀利」，講完之後Linda突然唔好意思，「好似講到好核突咁」，但係Do姐就覺得冇所謂，因為而家好多人都未經歷過。
大女Kelly出世後，鍾嘉欣形容BB「一嚿紅色嘅嘢，周圍都皺晒，啲白帶咁，你係我個女？」，而且發現要時間培養母女感情。
「越生就越識生」
到Kelly去幼兒園時，鍾嘉欣再懷孕，有日接女放學時遇到另一位媽咪，得知可以在家分娩，於是生第二、第三胎時都選擇喺屋企，並且盛讚在家生產唔駛縫針，「好得意㗎，即刻行到路，好靚㗎！」。Linda從中學到唔少生產技巧，甚至話「越生就越識生」、「你一自然擘開，佢就會瀡落嚟」，講講下又再覺得唔好意思，「死嘞，好核突添！」。
唔少觀眾對鍾嘉欣嘅印象都係斯文內向，連佢喺訪問都自認以前怕醜又細膽，但係做媽媽經歷完生產過程之後，鍾嘉欣體會到自己嘅力量比想像中大得多，「我生完小朋友後變咗個好勇敢嘅人」。
原文刊登於 Yahoo 娛樂圈
立即更新/下載AM730手機APP 體驗升級功能
