陳凱琳Grace創立自家朱古力品牌。
近年成功轉型KOL的陳凱琳，在媒體廣告分析平台admanGo公布的今年第1季（1－3月）十大IG品牌內容廣告銷售額（IG Branded Content Ad spend) 最高KOL當中排第2。網上廣告搵得多之餘，陳凱琳仲創立自家朱古力品牌，早前更加同本地小食媽咪麵crossover，將即食麵加入大熱之選的杜拜朱古力，以228港元售價推出。Grace找來不少美食KOL宣傳，而Grace拍片介紹專賣呢款朱古力的pop up store開張當日，有唔少朋友到場支持。
不過有明星效應之外，YouTuber大陳試食完陳凱琳推出的媽咪麵杜拜朱古力之後鬧爆，食唔晒之餘仲在鏡頭前掉入垃圾桶！
大陳試食的為$38媽咪麵開心果麻糬撻，及$228的開心果媽咪麵黑朱古力。佢認為將媽咪麵加上開心果麻糬撻，「搞到好似廚餘咁樣」，而黑色撻皮就「好似燶咗」，深綠色的醬顏色像坑渠水。外表以外，大陳批評「將啲又軟又硬又唔夾嘅嘢撈埋一齊，好似將食剩嘅嘢合埋一齊」，仲食到無名火起，一嘢整爛佢算。
至於朱古力，大陳就認為開心果、媽咪麵同黑朱古力唔夾，即使加多啲媽咪麵都唔覺得好食，甚至話所有嘢當中唯有包媽咪麵係食得晒！最後大陳冇食晒，憤而把餘下的掉入垃圾桶，話係「送返去應該去嘅地方」，並批評「你自己冇試過俾人食嘅咩？」。
雖然被負評，但陳凱琳的朱古力品牌會同本地一間平民餅店合作，推出朱古力大福，各位有口福啦。
原文刊登於 Yahoo 娛樂圈
ADVERTISEMENT
20周年「全城撐本地消費3重大激賞」！ 即睇活動詳情！
