《全民造星III》亞軍陳葦璇(Kira) 今年入行第10周年，Kira今年初開始成為獨立歌手自資出歌。（吳康琦攝）
《全民造星III》亞軍陳葦璇(Kira) 今年入行第10周年，Kira今年初開始成為獨立歌手自資出歌，並且推岀音樂作品《WAKE》。Kira日前接受《am730》專訪宣新歌《NEED YOU》，她說：「呢一首歌講我入行10年都係咁匆匆忙忙，從來都冇聽過自己想講啲咩，但係放慢腳步停落嚟，我一定要聆聽自己嘅內心，要每日都關心自己。」她指製作歌曲時與填歌人MAIA討論創作方向：「我哋第一次合作唔係好認識大家，所以再重新講我點樣入行，參加唔同嘅歌唱比賽入行，第一日已經有靈感寫咗歌詞俾我。」
陳葦璇(Kira) 日前接受《am730》專訪宣新歌《NEED YOU》。（吳康琦攝）
自資出歌唔理會賺錢定蝕錢
講到自資出歌面對的難題，她說：「拍MV都要聯絡化妝師同埋造型師。」她分享製作歌曲和拍MV總共起碼需要花費10萬以上，並透露：「我已經冇理到賺錢定蝕錢，由我決定咗歌手開始，我已經有預算要做幾多首歌。」她指除了專注音樂發展外，最近也忙於拍攝旅遊節目的工作。
陳葦璇分享製作歌曲和拍MV總共起碼需要花費10萬以上。（吳康琦攝）
自爆曾經歷過兩年總收入得四萬蚊
被問到入行10年最辛酸的階段，她說：「我做女團As One時期，第一張支票嘅收入就係四萬蚊，嗰四萬蚊就係兩年嘅收入。」至於會否鼓勵新一代入行，她表示：「最近真係好多新嘅朋友仔想入行，我覺得佢哋好叻，識得自己整音樂同埋拍片，鼓勵佢哋嘗試突破自己的感覺。」
陳葦璇(Kira) 曾經是女團As One成員。
提到男友陳頴業(阿Yip)參加ViuTV大型選秀節目《全民造星VI》，她笑言：「我冇鼓勵到佢，佢係報咗名先Cap圖WhatsApp話俾我聽，我都有問佢期望係咩？原來佢都係想喺跳舞方面發掘唔同嘅可能性，佢之前都係做排舞比較多，唔係成日喺電視呈現。我覺得真人騷嘅好處發掘自己唔同嘅面向，我覺得佢平時好搞笑。」她指自己參加《全民造星III》與男友參加《全民造星VI》是有分別，並繼說：「我哋嗰陣時參加嘅人真係有幕前嘅經驗，或者有認識嘅人，係非常親切。反而全男班參加應該更加熱血，聊天嘅話題都唔同，全部人都唔識大家。」
講到男友是否有詢問她當年參加《全民造星III》有關的黑幕，她表示：「我同佢講你預咗等好耐，我記得當時我係最後一個出場，我由朝頭早11點開始整頭化妝，總共等咗18個鐘先到我出場，嗰日仲要月經嚟，差唔多暈低。」提到男友是《全民造星VI》年紀最大的參賽者，她說：「40歲唔算大，韓國嘅人其實就好細個入行，佢預咗玩得都係大家會關注呢樣嘢，佢自己都唔覺得係一個問題。」至於男友有否透露希望日後成為男團成員，她表示：「佢目標係想去交流，去唔同嘅地方去交流當去學習。」
