2025-07-11 16:15:20

雲浩影個唱加場門票售罄直播爆料成立歌迷會獲鄭伊健上水留言打氣

雲浩影（Cloud）將於8月2和3日，假旺角麥花臣舉行首個個人演唱會「Finding Cloud 雲浩影演唱會2025」，昨日加場門票甫開售即告售罄，反應熱烈。好消息一浪接一浪，日前她在IG直播期間爆料成立官方歌迷會，令一眾「迷雲黨」非常興奮。大家議論紛紛之際，留言板出現了大師兄鄭伊健留言打氣，Cloud驚喜到O嘴！

Cloud直播時逐一回答留言，突然看著屏幕碌大雙眼，說：「呀，等陣先！」原來她看見留言板上出現「ekin_cheng_offical」留言「加油」，這是大師兄鄭伊健的IG賬號，甚少現身社交平台的伊健突然上水，更留言打氣，實在難得。

Cloud受寵若驚擘大個口，並說：「吓？Cap低先！伊健哥哥講加油呀，大家睇唔睇到呀？咁我要唱返首《數碼暴龍》（主題曲《自動勝利Let’s Fight》）先得喎！」有人留言問她會否邀請伊健做演唱會嘉賓？Cloud說：「我都好想請到佢，咁我就可以喺台上面同佢一齊踩Roller！」伊健寵師妹已不是第一次，2022年剛加入寰亞音樂的Cloud，與黃淑蔓在一次唱歌表演中遇上伊健，她們竟大膽自薦任對方演唱會嘉賓。伊健爽快一句「好啊」，安排她們成為其紅館「HERE and NOW演唱會」固定表演嘉賓，帶她們首次踏上紅館，分享舞台、分享愛。

其實Cloud當晚開IG直播，因為有重要事要搶先告知「迷雲黨」，就是她要成立官方歌迷會！出道以來，Cloud一直都好感謝「迷雲黨」自發組織不少應援活動，隨著人數日漸增加，希望成立官方歌迷會，令組織更強大和更有規模。據悉，寵粉Cloud為迷雲黨爭取福利，購買今次「Finding Cloud 雲浩影演唱會2025」門票，並於開騷日登記入會，可免本年度入會費，作為慶祝開騷和開歌迷會雙喜臨門。至於官方歌迷會命名重任，Cloud建議與迷雲黨一同參與，因為這是屬於大家的「家」。