魏駿傑小紅書拍片玩「你可能不認識我」梗 被網民串：係認唔到呀！
近年魏駿傑主攻內地市場，當然要玩下小紅書呢啲平台。日前佢就上載咗條片，一開頭就話「你可能不認識我……因為你們都太年輕」，跟手就彈出歷來多套主演劇集如《陀槍師姐》、《掃黃先鋒》同《金裝四大才子》等嘅片段。然後魏駿傑就話「回去問你爸媽，百分之87.6543的機率看過我演電視劇」，並以「中國香港演員魏駿傑」介紹自己。
網民暗串魏駿傑走樣不少
用「你可能不認識我」係內地社交平台嘅玩法，大概同魏駿傑嘅操作差唔多，就係中間攝一大堆過去演出嘅片段，用嚟介紹自己。魏駿傑呢個case嚟講，留言有趣過條片。最多人like嘅留言係話「不是不認識你，而是認不出是你呀」，暗串近年魏駿傑走樣不少。的而且確，片中魏駿傑喺《陀槍師姐》同《掃黃先鋒》時嘅顏值相當高，而家就……
另一個留言直情話「我認識滕麗名」，擺明挑機，唔知幾時有人會留「我認識張利華」，即係魏當年嘅「20歲女大學生」老婆，而家成為上等人嘅前妻。此外仲有唔少負評，例如「是出軌那個嗎？」、「普通話這麼爛 怎可能不認識你」、「年輕的時候好帥」，真係多謝晒。不過當然都有人留正評話「童年回憶」、「小時候最愛看TVB了」。
原文刊登於 Yahoo 娛樂圈
