黎澤恩這個笑容令人想起他在《刑偵12》的演出。(吳康琦攝)
《刑偵12》劇情未必人人明，但劇中的演員備受注目，其中一位便是樂隊MR.結他手黎澤恩(Ronny)，扮演張振朗的暗黑人格，角色設定非常兇殘，不少觀眾直言被Ronny嚇親。雖然Ronny再度演奸角，但他不擔心被定型，更自覺幸運「中途出家」遇到這些角色，令觀眾認識到「黎澤恩」。
神同步唔容易
Ronny直言接到劇本時，見到他的角色沒有名字，誤以為是不起眼角色，及後發現並非想像中的一回事，而且更要挑戰神同步，他隨即不停做功課，亦非常難忘首場戲便要跟張振朗神同步。他說︰「真係唔容易，振朗係專業演員，我係半途出家。咁我又玩咗音樂十幾年，我就盡量拿捏振朗個拍子，三、四take就已經OK！」他稱事前練習像彈結他一樣，不停練習直至熟悉為止，無論是對白速度、動作位置，如何做到無逢連結，他感恩過去拍攝累積下來的經歷。Ronny的付出，不止觀眾看見，與他同場不多的林保怡亦曾在宣傳活動時大讚。
唔要阻人收工
儘管近幾次Ronny演大奸角獲來好評，他不擔心被定型，「其實做正派都可以被定型，做演員就要做好佢，人哋就自己不停搵你做，係好正常嘅。我覺得要對得住監製、導演，最基本就係唔好阻人收工。我係好簡單，俾工作我做，我就要係做好佢，唔想被人話係因為Ronny阻收工。當然，依家做呢啲角色做得好、受歡迎，但係叫我演感情戲，要喊呢啲，自己又要點演呢，咁先係一個挑戰。依家我都等緊一個機會，等人哋睇到我另一面。」
一切都係經歷
他稱MR.暫停之後，自己因為要養家，保險、地產都有做，他坦言當時的感覺是很複雜，「MR.之前，我都係一個打工仔，辦公室環境唔係陌生，只係經過8年，開咗8場紅館之後，又返去辦公室工作，仲要對客，啲人仲要認得我，個下係好複雜。當時都有帶人去廣播道睇樓，路過電台個面，會諗返去以前柴娃娃日子做訪問，有fans去追，第二下再諗起自己係拎住張睇樓紙。不過，都係經歷，話你知要珍惜，有啲嘢好快就會無咗，但又好神奇玩返Band，又好神奇拍攝有個角色令人記得。千祈唔好放棄，好多嘢都係磨練，話你知將來條路點行，係因為之前行過嘅路。」
為生計賣走3支結他
他稱在MR.暫停的時間，又遇上疫情，自己當然是很徬徨，每個月都為租金、家用苦惱，迫於無奈下賣掉自己三支結他，其中一支更是陪他上過紅館。縱使萬分不捨，但為了生計沒有辦法，「賣又可以頂到兩個月租金，有時有拍攝、簽到單，政府資助藝人，就係咁慢慢捱過，每個月都係踩住條邊，咁又唔係只係得我一個，係全香港人都係咁，捱下捱下就咁過咗。」他形容指做地產的日子是他最「閉翳」時候，因為近乎沒有人敢睇樓，當下他坦言「覺得個天都幾絕，玩到咁大，冇嘅，都係全世界一齊捱，就要睇你捱唔捱到。」
黎澤恩回想過去幾年的低潮，他說︰「每個月都係踩住條邊，咁又唔係只係得我一個，係全香港人都係咁。」(吳康琦攝)
MR.開心最重要
隨住MR.重組，Ronny坦言很開心可以再繼續走下去，他覺得MR.像一輛車，因為成員重上這班車，歌迷是他們的電油，成功令這部車重啟。問到MR.未來的路，他表示已經不能像以前要有合約、受約束，「我本身都有合約，其他人都有佢哋嘅工作，依家我哋覺得自己要玩得開心先係最重要！究竟係咪長做落去，定係純粹短暫咁玩一年，我覺得唔要有個限制，做一件事開心無合約都會做，就會一直玩落去。」
觀眾仍在
他坦言曾有一段時間以為MR.不會再出現，自己也想不到重組的可能性，所以曾經安慰自己不要緊，起碼自己都試過組band。他說︰「世界就係咁奇妙，我發覺大家一齊唔好放棄，都係可以做到。當然唔會去返以前咁，但隊友係最重要，隊友先係第一身觀眾，我去睇佢哋表演，佢哋睇我表演，已經就係有觀眾。」
《高山祭》成為MR.重組後首次以4人姿態現身音樂會表演，MR.的觀眾仍在，他們重現令樂迷大為激動，MR.的「汽油」會不停為他們加油。
《高山祭》成為MR.重組後首個香港舞台。(網上圖片)
