娛樂
2023-01-17 18:00:00

《毒舌大狀》《超神經械劫案下》玩晒 賀歲檔竟然冇重磅西片落場

分享:

過幾日就係新年,幾年冇試過去戲院睇戲度歲,今年會唔會有少少掛住?今日同你點一點香港賀歲檔有咩新戲。

《毒舌大狀》

舊年港片大發圍,氣勢延續到今個賀歲檔。近幾年包辦賀歲冠軍嘅黃子華,今年以《毒舌大狀》出場,睇片名就估到套戲靠對白帶動,亦即係俾晒位子華神狂拋金句。而同片另一焦點可能係終於喺電影以主要角色出場嘅ERROR成員阿Dee(何啟華)。

毒舌大狀

毒舌大狀

《超神經械劫案下》

而打對台嘅係《超神經械劫案下》,主角係好多年冇拍戲嘅張敬軒,配搭本身好friend而演出又好有爆炸力嘅王菀之,最聰明係mark到Jeffrey魏浚笙同洪嘉豪。唔止因佢地多人follow,佢2位做喜劇應該有估唔到嘅效果。

超神經械劫案下

《1人婚禮》

港產賀歲片仲有最後關頭殺出嘅《1人婚禮》。導演係《幻愛》嘅周冠威,大家都明點解冇幾多戲院上,相信唔少同路人會撐。而且從《幻愛》嘅質素睇,吸引觀眾入場嘅唔一定係電影以外嘅原因。

1人婚禮

《非常貓狗反轉武林》

數完港片,然後到西片。往年總會有荷里活大片分一杯羹,今年居然冇!原因可能係《阿凡達》排咗12月上映,全世界(真係講緊環球電影市場)都避一避,去到2月先有Marvel嘅《蟻俠與黃蜂女 量子狂熱》。既然外國呢期都冇大片上,而今年又早咗過年,自然冇咩西片賀歲鉅獻。於是由MIRROR成員Edan(呂爵安)同Stanley(邱士縉)配音嘅動畫片《非常貓狗反轉武林》,成為唯一賀歲西片代表,但係相信唔少人入場係因為想聽Edan同大表哥配音,咁算唔算半套港產片?

非常貓狗反轉武林

《天龍八部之喬峰傳》

係噃,真係仲有半套港產片未介紹,就係甄子丹執導兼主演嘅合拍片《天龍八部之喬峰傳》。有丹爺即係有打戲睇,仲有金像影后劉雅瑟,陣容都唔錯架。

天龍八部之喬峰傳

原文刊登於 Yahoo娛樂LOL,am730獲授權轉

隱私權保護政策
請細閱並示意接受以下私隱政策及免責聲明,按下「接受」表示你已同意並願意接受 am730 網站內之私隱政策及免責聲明。了解更多
接受