陳慧琳與農夫唱經典歌《風生水起》、《花花宇宙》、《紀念日》及《大日子》。
農夫（FAMA）昨晚（18日）於澳門威尼斯人綜藝館舉行《農夫全香港最好笑嘅演唱會》澳門站，他們打破紀錄成為第一隊在澳門舉辦「最多人數(8000)進場」的華語嘻哈/說唱組合專場演唱會，為第一隊粵語嘻哈組合在澳門開最多人數嘅演唱！雖然票價比香港貴足「八蚊」，但依然全場爆滿，座無虛席。encore環節更迎來全晚高潮，天后陳慧琳（Kelly）驚喜現身，令全場陷入瘋狂！
「貴過香港唔代表有特別」
演唱會一開場，農夫即發揮其搞笑本色，陸永與C君甫上台即拎票價「開刀」。農夫笑言：「全香港最好笑嘅演唱會，澳門呢邊係點我唔知，但貴過香港八蚊，唔代表會有特別！」觀眾即大笑兼叫「回水」全場笑聲。
農夫繼續發揮其「計數佬」本色，笑指：「加八蚊！全場夾錢，6萬4蚊，買一次百家樂！輸咗冇計，贏咗聽者有份！」二人又即席演繹經典賭場「爛Gag」：「入門買開閒，輸到眼坦坦；入門買口莊，唔願返香港！」全場笑聲不絕，更抵死地補多句：「因為移民變咗威尼斯人！」
天后出場觀眾瘋狂
除了笑料不斷，農夫當然不少得唱齊經典歌曲。一開場音樂響起，全部觀眾已經企晒起身跳舞，氣氛瞬間熱爆場館。正當觀眾以為演唱會接近尾聲，安歌環節突然迎來全晚最大驚喜！《風生水起》音樂響起，舞台上螢幕出現大字「琳琳姐」，但見有人用「羅更」擋住面部緩緩升上台。起初觀眾還未為意，直至唱了幾句後，Kelly將羅更掉開，露出真身！全場觀眾完全冇預期到Kelly會現身，隨即陷入瘋狂狀態，尖叫聲及歡呼聲震爆場館！
Kelly先與農夫合唱《風生水起》，其後再與他們合唱《花花宇宙》及《紀念日》，將全晚氣氛推至頂點。
合唱過後，代替玲玲姐位置的「琳琳姐」，台上笑言：「玲玲姐唔嚟，因為佢出面手風好順！」觀眾瘋狂歡呼，農夫就話要同Kelly傾下學術性音樂，追問Kelly。陸永續說：「《大日子》呢首歌陪我哋好耐㗎喇，大家傾下首歌究竟講咩？Kelly, come on shake your body……之後睇番歌詞先知係『Kelly wanna move my body』？即係咩意思？Kelly過嚟郁我身體？郁我身體？咁鬼怪嘅？哈哈……」Kelly聽完都忍唔住笑：「你咁講完，我都開始覺得有啲怪。『Kelly wanna move my body』喎。」陸永再補充：「哦，即係有條友聽你音樂好想郁，但要問過你先！」全場再度笑到碌地，觀眾掌聲雷動。Kelly與農夫合唱完《大日子》後，農夫又化身組合「齋」。C君拿起結他伴奏，陸永則自認係「齋」嘅「顏值擔當」，又引來全場一陣笑聲。
農夫最後透露，完成澳門站後，將與張繼聰籌備全新綜藝舞台Show《人夫集團》，呼籲大家繼續期待，並預告或會展開世界及內地巡演，延續「全香港最好笑」嘅傳奇。
