夫妻的博奕｜林漪娸大讚郭柏妍係乖女謙虛女演員恨做Rosita奶奶

郭柏妍（Rosita）與林漪娸在《夫妻的博奕》中隨住劇情發展，將會變成婆媳，今次是二人首次合作，林漪娸已經對郭柏妍讚過不停，「Rosita個人真係好乖女，真人係乖到不得了，你係唔捨得唔錫佢㗎！佢好聰明，做綠茶呢個角色唔易做，同佢本身嘅性格完全唔同，但你同佢講完咁樣做會好啲，佢pick up得好快，佢非常之聰明！」

林漪娸坦言對方的角色有好多層次，不易做，她說：「因為佢本身唔係呢啲人，所以佢係唔會知道點樣做綠茶，佢係完全唔識，話咗俾佢聽之後，佢就好快pick up到！有一樣嘢好，佢個人比較真，所以融入埋個角色之後就變得好可愛，佢變成世界最強而唔乞人憎嘅綠茶！」在旁的Rosita聞言連番多謝對方，並感激她的教導。

郭柏妍林漪娸合作勁有火花

Rosita非常感謝漪娸姐在拍攝期間的照顧，她表示其中一場在大廈送飯的場口，是拍攝初期，對於綠茶角色掌握不是太好，「真係好好彩有漪娸姐示範俾我睇，令到我有返啲自信心，如果唔係都做唔到後邊嗰啲氣氛，我真係好緊張！佢會喺我身邊傾吓偈，令到我放鬆好多，我真係好多謝佢！」

今次林漪娸扮演張頴康的媽媽，性格市儈，她表示很開心見到網民鬧其角色。她又提到自己本身跟張頴康非常熟稔，經常在片場爆肚，而Rosita坦言在片場見到他們即興的演出，睇得非常過癮又開心。林漪娸坦言《夫妻的博弈》其實是喜劇，所以很多即興發揮加插，會令畫面豐富些。Rosita表示劇中很多場口，因為林漪娸在旁的關係，令她演得更好。

再讚郭柏妍

林漪娸再讚Rosita是一個很乖又有智慧的女仔，坦言自己如果有仔的話，會想要Rosita這樣的新抱。她說：「呢個年代已經冇乜好似佢咁嘅人種。佢有一段時間有少少混淆，佢做嘅時候唔知點樣揣摩呢個角色，所以就好緊張同迷失，我就同佢傾偈，佢本身讀書真係好叻，讀書只要勤力做好晒功課，就會好有信心知道自己做緊乜，但係做戲唔係，好多臨時嘅嘢發生，點樣將個角色豐富，喺佢個思維嚟講唔係好似讀書咁樣，佢就有啲嘢控制唔到，但係好開心佢之後做得好好。」問到日後會否想再合作，二人表示希望再有機會，期待公司日之後安排。