金燕玲與《媽樣年華》 導演胡翠兒於馬來西亞，出席大學講座。
金燕玲（Elaine姐）與《媽樣年華》新晉導演胡翠兒（Joey）導演，日前出席於馬來西亞舉行的「香港電影巡禮—吉隆坡站」開幕禮，並出席大學大學座談，以自身經歷鼓勵有志晉身電影業的大專生，分享在演藝圈堅持初衷的心得，並坦言期望獲得獎項目提名，視之為一種肯定。
相隔多年再訪大馬的Elaine姐表示，感激大馬觀眾一直支持香港電影，並知道近年不少香港製作來此取景拍攝。在大學座談上，她笑言：「我都好喜歡呢度（馬來西亞），我都好喜歡榴槤！」被問到如何在行業中堅持初衷：「你要好熱愛自己嘅工作，更加要接受到被reject嘅感覺。我係一個鍾意用工作講說話嘅人，從來都冇大公司做後盾去培養我，一直以嚟都係自己一路爬出自己嘅路。我深信只要做好每一場戲，無論戲份多少，都一定會有人見到。自信係自己畀自己嘅。」
作為金像金馬最佳女配角得主紀錄保持者，金燕玲大方分享如何看待獎項：「我好重視獎項呢樣野，因為我自己一個喺香港，所以訂定咗目標被人見到，得獎或者提名就能夠被人記住。我希望每一年都能夠得到提名，因為呢個係我對自己嘅要求。我到今時今日都仍然有工作，我都相信大家都可以，因為機會係留畀有準備嘅人。」
同場的導演胡翠兒自言有幸遇上金燕玲，為角色加上更深層次：「我寫呢個角色嘅時候，已經覺得好有趣，加上Elaine姐好多角色都係比較沉重，所以我想嘗試建立一個反差。呢個角色好搞笑又有智慧，同我開拍前遇到嘅Elaine姐對人生嘅睇法不謀而合，『想做就去做』，完全同戲中角色價值觀好相似，所以係一個好好嘅緣份。」
金燕玲在《媽樣年華》的角色為年過七旬、仍懷少女心的婆婆鳳梅，因網戀詐騙搬來與愛女周家怡同住，讓家庭關係再起波瀾的故事。影片以鋼管舞元素隱喻母親亦可追求自我價值，探討家庭、跨代關係與女性成長議題，為導演Joey寫給媽媽的作品，電影由周家怡、金燕玲、陳湛文、楊雅文、張迪文共同主演。
胡翠兒在大學修讀傳理／電影相關課程時，其中一份劇本功課寫下「一個瞞着家人學跳鋼管舞的媽媽追夢故事」，以此作為寫給媽媽的一封勉勵信，因她留意到媽媽因為過往要照顧家庭，放下了音樂夢想，主動提出替媽媽報名鋼琴班，但母親以年紀大、怕被人笑為藉口拒絕，不過Joey堅持先斬後奏，事至今日，胡媽媽已能輕鬆自信彈奏不同曲目，更積極參加比賽和演奏會。Joey早前親剪影片放上IG，吸引40萬觀看次數，更包括8500個分享次數，感動一眾網友。
ADVERTISEMENT
