周吉佩出席仁愛堂籌款月暨慈善獎券銷售活動。（娛樂組攝）
周吉佩與羅啟豪出席仁愛堂籌款月暨慈善獎券銷售活動。作為愛心大使的吉吉與啟豪走到台下呼籲fans買獎劵支持，吉吉的fans紛紛支持。其後吉吉上台唱出自己的作品《單眼皮愛大眼睛》。吉吉透露已經第二年參與仁愛堂活動，很開心可以幫到人。
踏入40歲身體響警號
由於吉吉在台上提到自己是「內雙」，他表示早前亦出現「內傷」，他說：「突然間出現頭暈，眼又痛持續一個月。行路會突然間舂一舂，所以就去做身體檢查， check晒專科，暫時未check到有嘢。醫生就話可能係壓力，所以就開咗啲藥等我瞓得好啲。（係咪血壓低？）check過啲血壓又好靚，所以就唔關血壓低事。醫生就話『你今年將會40啦，係咪有壓力？』可能屋企人嘅關係，所以去到四字頭就會驚一驚。」
至於他有甚麼壓力或苦惱，他說：「好多嘢擔心，可能大家見到我好開心、好正面咁，其實入面都有好多擔心同壓力，你知男人㗎啦，冇可能攤開晒出嚟同大家講，我唯有將呢啲情緒擺喺啲歌入邊。嚟緊出嘅歌都會轉一轉風格，同大家分享我內心想法。」問到太太有沒有煲一些湯水讓他滋補一下，他笑謂：「無！佢話我冇嘢，我就講笑同佢講其實最大壓力咪就係你囉！講笑啫！可能有小朋友，有好多家庭嘅問題要處理，希望喺之後嘅歌入邊等大家了解一下男人四十嘅心態。」
與一班好友慶祝迎接40歲
他提到昨晚與一班《中年好聲音》好友舉行生日派對，他坦言直至今早仍然很興奮！他說：「真係好開心！尋晚公司一班同事、朋友、《中年好聲音》嘅朋友、評審，連埋我太太呃咗我兩個月幫我搞個好surprise嘅生日派對！我到今朝仲好興奮，我咁大個仔未試過有咁開心、難忘嘅生日會，好多謝大家咁有心思！我本身好少搞生日party，我硬係覺得好尷尬，但係今次大家為我慶祝我就好感動，去到呢個年紀好感恩仲有咁多好朋友一齊過！」
和老婆同月同日生日
他透露跟太太是同月同日生日，他預告會在家中度過。他笑謂有秘密任務要進行，「以往都幾嚮往同太太生日一齊過，因為我哋同一日，所以就一直係二人世界，今年就夾埋小朋友希望做啲嘢俾返太太。其實我呢幾年嘅生日party都係同fans Club過，好辛苦，所以想為佢做少少嘢。」
他笑謂曾有一刻懷疑太太上網搜尋發現他們的生日是同日之後，才來找他。他說：「初相識嘅時候，佢同我講話同我同一日生日，我就問佢拎個身份證嚟睇吓，我一睇就呆咗30秒，我就話『既然係咁，我哋唔可以唔喺埋一齊！』之後就一齊咗啦，哈哈哈哈！」
