陳星妤為《女神配對計劃2》中推倒陳若思一事解畫。（娛樂組攝）
陳星妤今日（2日）出席TVB《「恒」動全城 — 全民皆「乒」》選拔賽，她於活動後受訪，談到昨晚播出的《女神配對計劃2》中，與求愛勇士Oswald在泳池的「騎膊馬」大戰，對戰陳若思（Amber）和阿朗時，出盡九牛之力將Amber撳落水，令對方頸部留下紅紅的抓痕，引起網上熱論。她表示基於遊戲精神，跟Amber沒有任何私人恩怨。
她說：「我無必要，亦無目的同機心去令對方受傷，喺水上搏擊令對方受傷，我係好抱歉，見到佢啲傷痕，其實我都肉痛。」她表示當日拍攝了24小時以上，節目組都知道大家狀態OK才繼續拍，「活動完咗之後，我都有問候吓佢狀態，肢體接觸之後見到有呢啲情況，都有問候同Sorry，其實真係唔係有心、唔係故意，我係好抱歉。」她自言是人生中首次與女生搏擊及肢體接觸，並在螢幕呈現，「我應該更加要照顧對方感受，可能真係太過投入玩遊戲，其實應該有少少保留，太投入喺唔係有心令對方整親係好抱歉。」
星妤事後雖然在社交發文道歉，但網民並不收貨，她重申自己責無旁貸，她再次道歉並謂：「我接受大家言論發表嘅自由，我都覺得自己做得不足，同埋吸取今次教訓，玩遊戲嘅時候就算投入都要有少少抽離，可能我下次會出聲話唔想有呢類比賽。今次鬥快推對方落水，令到佢有肢體上嘅不適，我係抱歉。」問到可擔心影響形象，她無奈表示，「已經造成咗印象冇得改變，我當然接受大家嘅批評，每個人嘅觀後感同感受，我唯一係吸取教訓，自己有不足，聆聽咗意見，下次有必要參加呢啲遊戲，友誼第一，唔好咁認真玩遊戲。」問到是否勝負慾強，「我唔會特登去輸，只係無盡投入。」
陳星妤表示自己只是太投入玩遊戲。
