AK江𤒹生自爆戀事，自認大男友。(林俊源攝)
MIRROR成員AK(Anson Kong, 江𤒹生)早前推出新歌《心死了幾百次》，繼《蝸牛》後回歸慘情歌行列，向來心直口快的AK自爆性格大男人，更屬管制級男友，禁止女友性感示人，更自言是冷戰高手，有時甚至會倔強抗衡。冷戰對象不只是女友，包括經理人花姐(黃慧君)，AK直言初出道時經常與花姐包拗頸，即使明知「瀨嘢」都一意孤行。出道7年，作為MIRROR副隊長的他不諱言，曾執著於團歌的歌詞分段，好一段日子感不快，感恩沿途有隊長楊樂文(Lokman)和好友陳卓賢(Ian)點醒，逐漸有所領悟。
落淚不出聲
《心死了幾百次》是繼《Love Is On The Way》後再與監製陳考威(Gareth)和填詞人陳詠謙合作，AK表示「其實公司一直想我出流行抒情歌，阿謙覺得我唱慘情歌嘅面向幾吸引，就建議我不如再出慘情歌。」新歌靈感受古巨基的《愛得太遲》啟發，主題圍繞情侶間的溝通，MV以死亡帶出「講得太遲」的遺憾。他坦言部分歌詞內容取自個人經歷，不乏愛一個、上一課的教訓。有些情侶拍拖，終日吵吵鬧鬧，但口齒伶俐的AK卻選擇沉默，「我係冷戰高手，由細到大即使被老師鬧，我係唔出聲任你鬧，全程poker face。以前細個同屋企人鬧交，做錯事或頑皮被打，我都係企喺度任佢哋打，當然好痛會喊，但可以唔出聲，因自知做錯，受罰都好合理。」從小養成的冷戰態度，無助溝通了解，當拍拖戀愛時，日積月累成為分手的導火線，「有時男人想避免紛爭，唔想正面回應或解決，拖一次或兩次的問題，像雪球越滾越大，最後一定會爆煲。」
嚴禁女友性感？
AK面對家人或女友，選擇報喜不報憂，「遇上解決唔到嘅難題，通常只跟兄弟分享，以前拍拖最多聽到嘅抱怨，就係咩都跟兄弟講，唔跟女友講，以前嘅伴侶會呷我朋友醋。」他解釋不是刻意隱瞞，只是不想女友擔心，當中不乏大男人心態，覺得不應該由女友分擔煩惱，他自爆不准女友穿性感，笑言游泳要穿「鯊魚戰衣」，「都有點大男人，食飯要搶著埋單，去沙灘或水上樂園之類，我會叫她在泳衣外笠件T-恤，冇得唔聽！不過，當最後因呢件事嗌交，我就會唔出聲，因道德上我係有啲唔啱。」
明知「瀨嘢」仍堅持
作為冷戰高手，AK直言識過跟女友冷戰3至4日，「我會Send個笑話逗她笑，不過問題係冇解決，然後下次鬧交又會拎返出嚟講。如果她繼續鬥氣，產生一種競技心態，大家鬥唔講，結果就累鬥累。」問到反過來被女友管制又如何？他笑言，「暫時冇人可管制我，其實拍拖我會向女友報備，起床返工收工，做足最基本的交代。」他分享曾經被女友追問在社交平台的互動，當然惹他反感，分手收場。AK不諱言潛藏一種反叛，最討厭別人說「不如你試吓……」的建議，初出道時經常與花姐搞對抗，「起初她叫我唔好做嘅嘢，我全部都做晒。從第一首solo開始，她就叫我應該要夾band，但我就是唔夾，要出情歌《特登》，就是包拗頸，當然自己都知『瀨嘢』。」
領悟花姐好意
隨年紀長大，他漸有領悟花姐好意，「我有些歌曲上的決策，的確太貪心太貪玩，花姐一直想我統一啲，甚麼都試會太雜亂，想我找個方法被人認識，某程度上我都同意，但那時我真係甚麼都想試。但我又唔可以話自己做錯，始終never try never know，其實甚麼是最好，我仍保持住unknown這答案。」連經理人的建議也不聽，誰能說服AK？他坦言，「Lokman最能撳得住我，做得唔好，佢會直接『炳』我，我係會聽他，當然不是一次就聽話，要不斷重複才會醒覺，但我好感謝仍有人真係肯出聲話我。還有阿陳(Ian)，他不會說太多，但當真係要講，他都會照直講。」他笑言兩人要說的都說了，現已進入自我消化的階段，隨著逐漸開竅已有覺悟。
沒有絕對公平
談到最大覺悟時，他猶豫良久才答道，「起初很容易對隊內團歌歌詞嘅分段好執著，因見到好似有問題，我就講出來，但其實都係自己執著，不如處理咗自己的事，點解去處理未必關我事或唔係我控制嘅嘢？那時我的世界觀係覺得有問題，執著於我覺得嘅公平，但只要擺低執著之後，問題可能依然存在，當我執著的方法未必可解決問題，就要懂得搵路去轉，開頭嘅我只有一條路，但Lokman阿陳都話俾我聽，可能旁邊有條樓梯，嗰度有條轉彎路，有好多條路可去到目的地。」他續說，「當時大家都睇到我唔開心，最後發現那唔開心，其實係自己攞嚟。當長大就發現，其實沒有絕對公平，沒有絕對嘅錯或對，中間仍有很大嘅灰色空間，怎樣在這個灰色空間遊走，都係一種學問。」問他這是成熟或是妥協？他稍作思考答道，「因為成熟，所以學識妥協。」
說得太遲的
AK新歌MV《心死了幾百次》講述男主角在自己的喪禮中，看到傷心落淚女友，才懊悔說得太遲的話。現實中，如果AK有機會回到過去，最想能夠回到嫲嫲臨終的日子，「嫲嫲病嘅時候，我要準備會考，那年我係有閉關努力溫書，雖然成績唔太理想，但沒太多時間見嫲嫲，直到我考剩口試，我去醫院探完嫲嫲，當時佢就走咗，所以跟她講嘅說話唔係好多。」他自言跟爺爺嫲嫲沒太深刻交流，反而常常聽外婆講故事，故此有機會也想多聽嫲嫲分享她的故事。
文：Grace 攝：林俊源
化妝 : Annie G. Chan
服飾 : ITHK / Ami Paris / N Hoolywood, Rayban(眼鏡) , Maple Sliver(首飾) ,Clarks(鞋履)
場地：BLACKROOM @blackroomhk
立即更新/下載AM730手機APP 體驗升級功能
