阿左用圖畫去描述失眠情況，每到凌晨三、四點是最煎熬的時間。(蘇文傑攝)
Beanies成員陳樂頤（Geor / 阿左）去年飽受喪妹之痛，來到今年，阿左的笑容回來了，卻又面對BEANIES成員由5變3，無論是親人還是隊友均以不同方式跟她分道揚鑣，加上歌手生涯的不確定性，令阿左在失眠期間有很多東西思考，當中包括一些人生的課題，正如她新歌《今夜無人入睡》入面提到「如何活得開心 此際有誰過問求重現一張笑臉」。
《今夜無人入睡》MV很簡單，只是一程船由阿左淡淡然訴說失眠之苦。
用笑容遮掩不安情況
去年初，阿左的妹妹因為學業和家庭問題，選擇輕生，她坦言當時是很崩潰，但隨住時間，自己今年「比上年進步，行動力高咗，所有嘢都番緊正軌。上年我嘅笑容係遮蓋內心嘅唔開心，依家係發自內心。」阿左去年晚晚失眠，夜闌人靜時，腦海不停回想傷心事。她坦言每合埋眼驚發惡夢，要不就是亂想東西，「我有時半夜好驚，好驚佢嚟搵我，但我又好想佢搵我，所以就瞓唔到。」
從治療師找到答案
她明白長此下去，自己也會出問題，於是去找治療師。她說：「上半年我去睇治療師，我都有問點樣先可以放低，佢話無，因為呢件事係會伴隨我人生而去，自己需要面對嘅課題係點樣帶住唔開心回憶、經歷繼續move on人生，我都學習緊，佢都有話唔好急於處理人生問題，因為好多人都有唔同嘅問題，唔好急住處理，而係學住帶住去繼續下一步，先可以令自己進步。」
阿左透露至今仍有找治療師，失眠間中也會有。(蘇文傑攝)
妹妹離世又面對Beanies變動
妹妹的離去對阿左打擊最大，同時又面對Beanies的變化，她感慨上天好像跟她開了一個又一個的玩笑。阿左說：「當5個變3個嘅時候係好唔開心、唔捨得，因為大家個初心都係想一齊唱好啲歌，5把聲同3把聲效果又好唔同。但係，人生就係有好多變化，今日唔知聽日事，唔知3個會唔會變1個，我依家好著重同另外兩位溝通，將溝通變成第一位，大家亦學習咗要好好坦白，更加珍惜大家。」
學會不要強裝
她回想當日收到妹妹離世的消息時，正值Beanies為演出彩排，自己不敢跟隊友說，心情是非常糾結，擔憂影響隊友們的心情。「我只係同經理人講，個一排唔開心唔係好表面，但一遇到某啲歌詞觸動到我，我就跑入廁所喊，整頓好再出番去跳舞，事後我有同番佢哋講，佢哋話我唔講，反而令佢哋更擔心，我諗番自己如果有朋友唔開心扮無嘢，我都係會好擔心。我學習咗有咩唔開心、開心都好，都同佢哋分享。」她很感激Beanies在那一階段的陪伴。
努力走出來
她稱去年的自己「唔想郁」，就連朋友都不想見，今年的行動力就比較大，自己無論是工作、社交上都積極起來。她坦承時間是很好的良藥撫平自己的不安，「暫時嘅我少亂諗嘢，時間係一個方法，其實自己都要努力走出嚟。」
找到快樂的畢生責任
《今夜無人入睡》是寫在阿左外遊散心時，紀錄了她失眠的心情，其中一句歌詞「或者該 慶幸沉澱出 找到快樂的畢生責任」描述了阿左對自己的期盼，她坦言學識面對情緒，珍惜擁有的人和事，亦深明其工作是被動模式，自己會向隊友的張天穎學習，因為對方在工作不多時，也會主動找東西去做，如不停拍片搞網上內容，務求令自己要動起來。阿左說：「我依家會諗到就做咗先，起碼自己要郁先，主動啲！去搵番開心嘅嘢，其實同啲朋友講下無聊嘅都已經好開心。」
ADVERTISEMENT
