2025-09-17 21:30:37

Bob林盛斌結束《女神配對計劃》勁感慨半裸自拍想搲贊助操fit變肌肉男

林盛斌（Bob）一向是圈中「吸金王」，向來百足咁多爪，除了是金牌司儀外，亦是時裝店及娛樂製作公司老闆，賺到盤滿缽滿。

Bob擔任金牌媒人兼主持的《女神配對計劃》已圓滿結束，他近日在社交平台發長文抒發心情：「終於，完咗啦。我記得當初監製搵我傾呢個project嘅時候，我已經知道，呢個可能會係我主持過咁多個節目入面，最容易做，亦都係最難做嘅一次。容易，係因為要記嘅嘢唔多，要講嘅嘢唔多，好多時只係簡單地講咗個規則同埋流程俾大家知道，因為成件事係冇對白，冇劇本，純粹由佢哋去發展，所以你唔需要記啲乜嘢稿，仲要係一個錄影節目，唔會好似做大show嘅live咁，會有太大嘅壓力。難做，正正就係因為冇任何預設嘅storyboard，一路拍，一路都會發生好多意想不到嘅事，亦都唔可以用平時輕鬆搞笑玩嘢嘅主持手法去處理，我自己都要好好去調教我講說話嘅語氣、速度同感覺，因為要控制同穩定返成個節目流程嘅氣氛同節奏，同埋好多感動同埋驚喜嘅Moment，只係得一take，仲要呢幾個月好似做咗個心理醫生咁樣，喺鏡頭後去管理同疏導女神同參加者們嘅情緒同心情，呢個已經超越咗我平時做主持或者司儀嘅能力範圍。」Bob亦有問網民他這個金牌媒人是否稱職，當然獲大批網民留言讚好。

昨晚，Bob又再出po，今次竟半裸上身，在浴室鏡前自拍肉騰騰寫真，他還問：「講真，唔好計個樣，淨係呢副架撐，如果想操到好似之前周柏豪同張繼聰最fit嗰個款，有冇計？難唔難搞？有冇健身中心或者私人教練願意贊助吓呢個大project？」自薦成為健身中心的生招牌，不過網民均建議他切勿刻意減肥，認為現在的圓碌碌形象最適合他，還有人利用AI滿足Bob心願變成八嚿腹肌的筋肉人。