C AllStar為《人類世》拍封面禁廁8小時 可樂洗頭嗌好爽

 今年合體的C AllStar將於明天(26日)推出新專輯《人類世》，適逢加盟寰亞十周年，「留低的與重生的 C AllStar Archive」展覽將於同一天於尖沙咀The One商場揭幕，屆時他們除了分享新專輯創作概念，並會演唱多首新歌。

洗頭秘方 靠可樂

成軍12年的C AllStar於合體後化身「地球保衛隊」，以世界末日及重生為概念推出新專輯《人類世》，由創作每首歌、紅館開演唱會、舉行展覽到推出實體唱片，環環相扣，新碟封面拍攝延續紅館演唱會四子與大自然共存的造型，由頭髮到腹肌都塗滿麵粉、顏料和黏土等仿泥灰物料超過8個小時，何建曦(Jase)不禁讚嘆是「行為藝術」，當宣布收工一刻陳健安即從雪櫃拿出一罐可樂汽水並衝入廁所，原來這是洗頭秘方，冰凍可樂照頭淋，難怪邊洗邊嗌「爽」！

呼籲醒覺

談到新專輯企劃，在決定合體後便立即啟動，吳崇銘(King)說：「喺呢個企劃裏，我哋由『地球保衛隊』變成世界未日後嘅生還者，經過不斷進化，成為全新地球嘅新物種，與植物和大自然融為一體。」陳健安補充：「纏喺我哋身上嘅植物，以為係枯萎，其實係有生命，用另一個姿態重生，係充滿希望和正能量。」釗峰說：「點解講咁多地球嘅嘢？分享一個基本小知識先，陳健安之前有首歌《一吻穿越四十六億歲》，46億歲係地球嘅歲數，如果折換人類嘅生命計算，人類只係佔地球少於一秒鐘，雖然人類好渺小，但破壞力好大。有好多說法，其中話我哋呢代係地球最後一代人類，被稱為『人類世』，亦即是今次整個企劃嘅主題。」他們透過歌曲、表演、唱片和展覽，以不同方式去傳達人類與地球的關係，希望令人思考如何愛惜可能是最後一代的地球，陳健安說：「醒覺只要一秒！」

C AllStar為《人類世》拍封面禁廁8小時  可樂洗頭嗌好爽