COLLAR演唱會尾場氣氛高漲。(蘇文傑攝)
COLLAR一連兩場的演唱會《COLLAR “GAME ON” LIVE 2025》尾場於昨晚（29日）在亞洲博覽館舉行。MakerVille新任CEO兼今次演唱會出品人金廣誠與MIRROR的江𤒹生（AK）、柳應廷（Jer）、李駿傑（Jeremy）、邱傲然（Tiger）、ERROR的郭嘉駿（193）、何啟華（Dee）、陳穎欣（Yanny）與音樂人男友陳考威（Gareth）、陳毅燊（Ansonbean）及其弟、馬志威等入場支持。
由於尾場的關係，整晚氣氛比首場更高漲，COLLAR從舞台跳起的一刻，全場尖叫聲震耳欲聾。當她們唱《Never-never Land》要走到場的另一個小舞台時，所有區域的人都湧近台前，她們為了盡量滿足所有粉絲需要，她們不停跟通道兩旁的粉絲握手，直至全員上了升降舞台，才可以唱出《Soda pop》，全場人士企起身，氣氛高漲。Gao表示演唱會不設encore，所以只好全場清唱數句《Chosen Family》，而Day突然雙眼通紅，眼濕濕，眾人表示Day甚少在別人面前哭。
其後她們回舞台跳唱多首快歌之後，與dancer等人一同答謝觀眾，向來易感觸的Gao表示還有一首歌要唱，所以會努力平伏自己，於是邀請所有隊友講感受，一眾隊友全都忍不住眼濕濕，芯駖、Ivy So更哭成淚人，不停用紙巾抹眼淚。Day說︰「好多謝大家，真係冇諗過會收穫到咁多愛，我哋都係幾冇自信、好混亂嘅人，換衫都好混亂，所以要拍條片，俾時間我哋換衫。大家好冇自信嘅時候，每當演唱會見到每一位大家，覺得好開心，同埋冇諗過大家會同我哋……識唱我哋嘅歌，我已經覺得好感動嘅一件事，多謝大家每一位。」
Candy則表示︰「今次準備呢個演唱會嘅過程，其實係好辛苦嘅我覺得，我feel到大家都好想今次做到啲唔同嘅嘢，俾大家睇，所以我好多謝大家買飛入場，去支持我哋，去睇我哋表演嘅每一位。」之後更大叫：「我畢業喇！我可以全職投入COLLAR！」全場起哄。
Marf：「一直以來我哋都係好似一個平凡人嘅內心，雖然我哋堅強咗好多，但係都仲係真心地、唔係客套地覺得，唔敢相信我哋會唱歌，唔敢相信我哋出咗歌。但係都好多謝你哋每一位咁support我哋，同埋好多謝每一位好同唔好嘅評語俾返我哋，都係好似Candy咁講，我哋今次做咗好多努力，無論Dancers，跳到汗同血同肉佢都分唔到喇已經，而我哋都練咗好多好多唔同、好勁、好爆嘅機關俾大家睇，係咪好爆先？好多謝每一個單位俾我哋嘅每一個信心，同埋勇氣，同埋每一個容許同包容，所以我哋都好愛你哋，多謝！」
芯駖邊哭邊說︰「點解我哋好似比之前更加攰呢？因為我哋有好多嘢都好想做到最好，無論係rundown，我哋唱歌，其實我哋好多人唱歌都唔叻，我哋有好多努力擺咗喺入面，我覺得係好感動……多謝大家俾包容我哋，俾時間我哋去進步。我哋有好多傷兵，每一日都有我哋醫療團隊，幫我哋針灸，隻腳好痛。第一套衫其實好重，差唔多八磅咁重，我哋負重練彈台未必有人知道，但係我哋一路都覺得，點解我哋要用咁多力去做一啲嘢，我覺得係每一次見到大家聽我哋唱歌，俾掌聲、俾力量我哋嘅時候，我覺得一切都係值得！因為我哋除咗一啲大家都識唱嘅廣東話歌，希望我哋嘅歌喺某一啲時間裡面可以陪伴到大家，咁我哋就已經覺得可以功德圓滿。」
一向易感動的Winka就強忍眼淚：「我好多謝大家，我係一個好多情緒、好高敏嘅人，我多謝團隊一直陪住我，我覺得我喺今個演唱會，終於享受到跳舞唱歌嗰一種自信、開心，我唔再驚我做成點，因為我諗返起我以前busking嘅時候，冇一個人睇，我都係咁樣唱，何況而家有咁多人喺度睇，我點解唔唱好跳好？點解唔拎多個自信同埋嗰份勇氣出嚟，所以我多謝你哋陪住我咁耐，無論經歷啲乜嘢都好，見到啲燈牌、嗌，同埋fans依舊喺度支持我哋，整手燈，做好多嘢，我真係好愛你哋，多謝！大個女喇！」
Ivy So說︰「我覺得我出道之後，多多少少都有迷失過，每次捉返我返嚟，或者令我堅定返嘅，係每一次出團歌之前嗰一個禮拜，我見返COLLAR嘅時候。佢哋一直都陪住我，見到佢哋無論發生咩事，無論出面遇到乜嘢、聽到乜嘢comment、工作好辛苦，但佢哋依然喺度係咁請我食蛋，我覺得COLLAR每一個人都好值得俾人喜歡，大家為佢哋鼓掌嘅時候，係我最感動嘅時候！我真係好鍾意你哋，COLLAR真係好勁，同埋我喺度好想特別咗多謝兩個單位，第一個係Mike Orange，呢個小秘密， Mike Orange每個禮拜一至兩日都教我、Gao同Candy唱歌，呢兩個月廣東話樂壇嘅歌都俾我哋唱得差唔多，同埋就係我哋面前嘅dancer，COLLAR嘅舞都難㗎嘛，佢哋係一日記一隻歌，好誇張！辛苦晒！多謝你哋！同埋排舞師都好厲害。」她們亦不忘多謝細So為COLLAR設計了這次的流程。Gao最後說到︰「我想講嘅就係Game on, Never Game Over，人生係一個好好玩嘅遊戲，永遠都唔會輸。」
當Gao回到後台唱《Goodbye days》後，歌迷明知沒有encore，久久未離開，更不停大喊她們的名字，最後COLLAR換了另一套衫上台跟在場粉絲大合照，並播出她們被工作人員偷偷拍下眾人在家練歌的畫面作為彩蛋送給fans。
COLLAR播出她們被工作人員偷偷拍下眾人在家練歌的畫面作為彩蛋送給fans。(蘇文傑攝)
ADVERTISEMENT
🥮請你食皇玥經典流心雙輝月餅🥮
👇🏼立即登記參加👇🏼
