娛樂
2024-06-14 19:00:00

Mayanne小喇叭 |《東張》6大女神親回被指賣弄性感 梁敏巧自爆屯門警署有成呎厚File

分享:
東張六大女神親回被指賣弄性感。

東張六大女神親回被指賣弄性感。

由麥美恩(Mayanne)擔任主持的清談節目《Mayanne小喇叭》加推「加長版」,明晚(15日)一集邀請《東張西望》六位女神吳幸美、李旻芳、何沛珈、梁敏巧(Maggie)、陳懿德(德德)及黎寬怡(貓仔),分享採訪辛酸史。 

節目中,六位「東張女神」輪流講出自己勝任《東張》主持崗位的重要元素,李旻芳自覺勇字行頭,甚麼都肯做;Maggie和德德入行前則同樣做過記者及小編;貓仔笑言可能樣貌與元祖級「東張女神」吳幸美相似,不時被認錯為對方;何沛珈更激罕公開面試時監製其中一條問題:「佢問我驚唔驚曱甴、老鼠,我話連屍體都唔驚。」自認夠貼地的吳幸美,對於當年做「測試專員」試飲「斷片酒」成代表作,幸美坦言曾擔心被指扮醉,並澄清當時真的喝醉:「條片係想嘗試話畀大家聽,女仔飲咗酒有機會有危險,後尾條片畀政府買咗嚟做宣傳教材。」 

李旻芳見證攝影師遭惡人叉頸 ,有感人生安全受威脅。 李旻芳透露母親常為其工作感到擔憂。 德德入行前做過小編。

談到《東張》主持不時要深入「鼠」穴及曱甴屋採訪,貓仔和Maggie曾體驗過老鼠和曱甴發出的360度「環迴立體」聲效,而且已懂得分辨垃圾、曱甴屎甚至死老鼠的氣味;她們又指追訪期間不時遇上驚險事,旻芳透露有次到圍村拍攝,攝影師遭惡人叉頸兼粗言穢語問候,對方更向她作出恐嚇,旻芳坦言當時覺得生命受到威脅:「第一次拍嘢拍到腳軟!但當時做緊嘢已入咗working mode,就算佢哋咁樣對我哋都繼續。」貓仔則憶起到元朗大橋街市採訪「蛋蛋姐」經驗,當時有指「蛋蛋姐」曾擸刀刺大伯,而且檔口總插著一把菜刀,故採訪帶有一定危險性,貓仔說:「當時要確保電視框入面見到我同佢,又唔可以畀佢拮到,睇住有咩動靜要即刻彈走!」 

多次在屯門採訪至報警收場的Maggie,笑指在該區警署「File成呎厚」,她透露採訪大媽聚集公園賣唱時,不但遭疑似忠粉叔叔爆粗恐嚇,對方更動手推跌攝影師,並在攝影師身上抓出多道血痕:「我哋唔會主動報警,除非人生受到傷害,或有人犯法,通常係當事人報警話我哋騷擾佢,所以要記低資料。」旻芳透露母親常為其工作感到擔憂,說到此處更不禁淚水盈眶哽咽道:「每次節目出街後都會問我有冇事,聽到媽咪咁講我哋做嘢雖然係好辛苦,但幫到人覺得好值得。」

adblk5
吳幸美試飲「斷片酒」片段成政府宣傳教材。 何沛珈入行後感迷失透過訪問尋回初心。 梁敏巧屯門警署File成呎厚 。 貓仔深入「鼠」穴+曱甴屋恐懼解鎖 。

除了投訴和驚險case,《東張》亦會為有需要人士作出器官捐贈呼籲,並曾促成好事。幸美曾採訪一名20多歲女子,因心臟有事一直等待移植機會,其痴情男友一直堅持在旁守護,並希望手術成功後與她結婚,幸美憶述:「節目出街後真係有人捐心,亦冇排斥,佢哋最後結咗婚、組織咗好好嘅家庭,好感動,我哋《東張》幫到人。」做過護士的何沛珈,坦言入行後曾感到迷失,惟加入《東張》後找回初心:「透過每一次嘅case、訪問搵番初心,原來做artiste可以透過另一份工作去幫到人,搵番個意義出嚟。」 

「東張女神」正義感夠煞食之餘,她們的貼身、小背心造型亦經常備受網民關注,錄影當日Maggie一如以往穿開窿上衣亮相,德德吊帶裙亦十分吸睛,令Mayanne不禁問到「東張女神」是否有dress code!想知道一眾「女神」點答,且對被外界認為賣弄性感有何看法?密切留意明晚節目。